खेड : गुहागर मतदारसंघातील कोणत्याही गावकऱ्यांला यापुढे विकास निधीसाठी कोणाच्याही घरी जाण्याची गरज नाही. त्यांच्या गावचा विकास करण्यासाठी मी सक्षम आहे. पन्नास कोटींचा निधी मी या साडेतीन जिल्हा परिषद गटांसाठी आत्तापर्यंत आणला आहे. यापुढे गुहागर मतदारसंघावर भगवा फडकविल्याशिवाय गप्प बसणार नाही, असे रोखठोक प्रतिपादन शिवसेनेचे ज्येष्ठ नेते रामदास कदम (ShivSena leader Ramdas Kadam) यांनी केले.

गतवेळच्या निवडणुकीत तटकरे दापोली आणि गुहागर मतदारसंघातून (Guhagar Constituency) पिछाडीवर होते. त्यावेळी मी गीतेंसोबत होतो. परंतु यावेळी मागची कसर सव्याज परतफेड करू, असेही त्यांनी स्पष्ट केले. गुहागर विधानसभा मतदारसंघात येणाऱ्या लोटे येथे शिवसेना नेते रामदास कदम, खासदार सुनील तटकरे व प्रा. ज्योती वाघमारे यांची जाहीर सभा झाली. या वेळी सदानंद चव्हाण, बाबाजी जाधव, अरुण कदम, सुनील मोरे, अरविंद चव्हाण, सचिन धाडवे, शशिकांत चव्हाण आदी उपस्थित होते.

रामदास कदम म्हणाले, ‘माजी खासदार अनंत गीते यांच्या खांद्यावर बंदूक ठेवून मी राज्याच्या मुख्यमंत्री होऊ नये म्हणून उद्धव ठाकरे यांनी २००९ च्या विधानसभेच्या निवडणुकीत मला पाडले. संपूर्ण राज्यात भाजपसोबत महायुती असताना विनय नातू यांनी माझ्या विरोधात निवडणूक लढवली. गीतेंच्या विजयामुळे त्यांना मंत्रिपद मिळाले. परंतु मला साहेबांनी (माझ्या शिवसेनाप्रमुखांनी) विधानपरिषदेवर घेतले. माझा पराभव झाल्यानंतर खेड तालुक्यातील साडेतीन गटाकडे माझे दुर्लक्ष झाले. हे मी कबूल करतो.’