खेड (रत्नागिरी) : कोरोना रोगाचे संशयित म्हणून येथील कळंबणी उपजिल्हा रुग्णालयात दाखल करण्यात आलेल्या दोघांपैकी एकाच्या सर्व चाचण्या निगेटिव्ह आल्याने त्याला घरी सोडण्यात आले आहे. मात्र, दुसऱ्या संशयित रुग्णाच्या काही चाचण्या अद्याप बाकी असल्याने त्या 
रुग्णाला विशेष वाॅर्डमध्ये देखरेखीखाली ठेवण्यात आले असल्याची माहिती कळंबणी उपजिल्हा रुग्णालयाचे अधीक्षक डॉ. गरूड यांनी दिली.

लोटे पंचक्रोशीतील सुमारे ५० जण २६ फेब्रुवारी रोजी नेपाळ येथे फिरण्यासाठी गेले होते. ६ मार्चला हे सारे नेपाळहून लोटे येथे परत आले. ९ मार्चला यापैकी दोघांना सर्दी खोकल्याचा त्रास होऊ लागल्याने दोघांवर लोटे प्राथमिक आरोग्य केंद्रावर उपचार करून कळंबणी येथील उपजिल्हा रुग्णालयात पाठवण्यात आले होते.

हेही वाचा- अडीच महिन्यांच्या बाळाला त्याने लादीवर आपटले अन् घेतला तीचा जीव...

दोन संशयितांपैकी एकाला सोडले घरी

सध्या जगभरात कोरोनाची असलेली दहशत आणि नेपाळ सहलीवरून परतल्यावर दोघांना सर्दी खोकल्याचा सुरु झालेला त्रास यामुळे खबरदारीचा उपाय म्हणून या दोघांनाही कळंबणी उपजिल्हा रुग्णालयात सुरु करण्यात आलेल्या खास वॉर्डमध्ये दाखल करण्यात आले. दरम्यान त्यांच्या घशाच्या स्त्रावाचे नमुने घेऊन ते तपासणीसाठी पुणे येथील प्रयोगशाळेत पाठविण्यात आले. या नमुन्यांपैकी पुरुष रुग्णाच्या नमुन्यांचा अहवाल निगेटिव्ह आल्याने त्या रुग्णाला शुक्रवारी रात्री उशिरा घरी सोडण्यात आले.

हेही वाचा- कसबा तारळे विठ्ठलाई, सिद्धेश्‍वर यात्रा रद्द..

 महिला रुग्णाच्या चाचण्या बाकी

मात्र, यातील महिला रुग्णाच्या काही चाचण्या अद्याप बाकी असल्याने तिला अद्याप कळंबणी येथील उप जिल्हा रुग्णालयात वैद्यकीय अधिकाऱ्यांच्या विशेष निगराणीखाली ठेवण्यात आले आहे. नेपाळ येथे सहलीला गेलेल्या अन्य ४८ जणांचीही रत्नागिरी येथून आलेल्या आरोग्य विभागाच्या विशेष पथकाने तपासणी केली; मात्र या ४८ जणांमध्ये कोरोना रोगाची कोणतीही लक्षणे आढळून आली नसल्याने खेडमध्ये कोरोना आला नसल्याचे स्पष्ट झाले आहे.