खोपोली : कोरोना संकट, लॉकडाऊन व निधीची कमतरता यामुळे मागील सात महिने खोपोली शहरातील विकासकामांना ब्रेक लागला आहे. मात्र, दिवाळीनंतर प्रलंबित सर्व विकासकामांना गती देण्यासाठीचे नियोजन करण्यात आल्याने आगामी काळात खोपोली शहराची विकासाची गाडी रुळावर येणार आहे. 

खोपोली शहरातील विविध विकासकामे लॉकडाऊन आणि निधीअभावी रखडलेली आहेत. मात्र, या कामांना दिवाळीनंतर गती मिळणार आहे. या विकासकामांमध्ये रखडलेल्या प्रमुख रस्त्यांच्या कामांसाठी जवळपास 22 कोटी, डॉ. बाबासाहेब आंबेडकर पुतळा उभारून परिसर सुशोभीकरण, छत्रपती शाहू महाराज सभागृह डागडुजी व दुरुस्तीसाठी 10 कोटी, अंतर्गत 16 रस्त्यांसाठी पाच कोटी, कचरा डम्पिंग यार्ड सुशोभीकरण, आधुनिक दिवाबत्तीसह प्रत्येक नगरसेवकांसाठी त्या-त्या वार्डमधील विकासकामांसाठी 20 लाख निधी उपलब्ध होणार आहेत. 

वाचा हेही : सरकारने पंचनामे न करता शेतकर्!यांना ताबडतोब सरसकट आर्थिक मदत करावी - डॉ. अनिल बोंडे

एमएमआरडीएकडून मंजूर असलेला साडेनऊ कोटींचा निधी, आमदार महेंद्र थोरवे यांच्या माध्यमातून साडेपाच कोटींचा निधी लवकरच नगरपालिका तिजोरीत उपलब्ध होणार आहे. यातून रखडलेली विकासकामे पुढील चार-पाच महिन्यांत पूर्णत्वास येतील, असा विश्वास नगराध्यक्ष सुमन औसरमल, उप नगराध्यक्ष विनिता कांबळे व मुख्याधिकारी गणेश शेटे यांनी व्यक्त केला आहे. दुसरीकडे स्वच्छता सर्वेक्षण अभियानासाठीची तयारी व नियोजनही करण्यात आले आहे. 

अधिक वाचा : मुरूड तालुका कोरोनामुक्तीच्या मार्गावर! केवळ सहा रुग्ण पाॅझिटिव्ह

प्रस्तावित विविध विकासकामे, रस्त्यांची कामे दर्जेदार होतील, यासाठी काटेकोर नियोजन होण्याची आवश्‍यकता असल्याचा आग्रह नगरसेवकांनी केला आहे. तसेच ही कामे करताना जनतेच्या मागण्या, दैनंदिन अत्यावश्‍यक सुविधांना प्राथमिकता मिळावी, यासाठी येथील स्थानिक सामाजिक संस्थाही जाग्या झाल्या आहेत. 

आणखी वाचा : नवरात्रोत्सवात खरेदीकडे ग्राहकांची पाठ; बाजारपेठेवर मंदीचे सावट

दिवाळीनंतर मोठ्या प्रमाणावर विकासकामांचे नियोजन करण्यात आले आहे. यात शहरातील रस्ते, उद्यान दुरुस्ती व डागडुजी; तसेच डॉ. बाबासाहेब आंबेडकर पुतळा उभारण्याच्या कामांना प्राथमिकता देण्यात आली आहे. 
- सुमन औसरमल, नगराध्यक्ष 

(संपादन : उमा शिंदे)