लांजा : जिल्ह्याचे पालकमंत्री उदय सामंत (Uday Samant) यांच्याबद्दल अपशब्द वापरल्याबद्दल आमदार राजन साळवी (Rajan Salvi) यांचा शिवसेना (Shiv Sena) शिंदे गटाच्यावतीने लांजा येथे जाहीर निषेध करण्यात आला. तालुक्यातील सापुचेतळे येथे शिवसेना ठाकरे गटाच्यावतीने सोमवारी (ता. ९) होऊ दे चर्चा या कार्यक्रमाचे आयोजन करण्यात आले होते.

या कार्यक्रमात आमदार राजन साळवी यांनी पालकमंत्री उदय सामंत यांच्याबद्दल अपशब्द वापरले होते. या प्रकरणी आज शिवसेना शिंदे गटाच्यावतीने लांजा येथील शिवसेना संपर्क कार्यालयात पत्रकार परिषद घेण्यात आली.

या वेळी माहिती देताना तालुकाप्रमुख गुरूप्रसाद देसाई तसेच येथील पालकमंत्री यांचे समर्थक शंकर गोरे यांनी सांगितले, होऊ दे चर्चा या कार्यक्रमात विकासावर चर्चा करत असताना आमदार राजन साळवी यांनी आपण तालुक्यात मोठ्या प्रमाणात विकास केला. खानवली सापुचेतळे या रस्त्याला चार कोटींचा निधी मंजूर करून आणला. उलट उद्धव ठाकरे यांना मुख्यमंत्र्यांच्या खुर्चीवरून खाली आणण्याचे काम उदय सामंत यांनी केले म्हणत त्यांच्याविषयी अपशब्द वापरले होते.

त्याला शंकर गोरे यांनी जोरदार विरोध करत तीन प्रश्न विचारून निरूत्तर केले होते. या पार्श्वभूमीवर आज लांजा येथे पत्रकार परिषद घेण्यात आली आणि आमदार राजन साळवी यांच्या वक्तव्याचा खरपूस समाचार घेण्यात आला.

गेल्या १५ वर्षांत आमदार म्हणून राजन साळवी यांनी या मतदार संघात किती विकास केला आहे, हे जनतेला ज्ञात आहे आणि म्हणूनच मागील विधानसभा निवडणुकीत त्यांच्या मताधिक्क्यात मोठ्या प्रमाणात घट झाली होती. २०२४ च्या निवडणुकीत कोण कोणाला गाडते यापेक्षा गेल्या दहा वर्षात किती विकास झाला, हे बघूनच लोक मतदान करतील आणि संबंधितांना त्यांची जागा दाखवून देतील, असे तालुकाप्रमुख देसाई म्हणाले. यानंतर आमदार राजन साळवी यांचा जाहीर निषेध करण्यात आला.