ओरोस (सिंधुदुर्ग) : यशवंत पंचायत राज अभियान २०१८-१९ मध्ये सिंधुदुर्ग जिल्ह्याने तिहेरी यश संपादन केले आहे. सिंधुदुर्ग जिल्हा परिषद आणि कुडाळ पंचायत समिती राज्यातील अव्वल ठरली आहेत. मालवण पंचायत समिती कोकण विभागात द्वितीय आली आहे, अशी माहिती जिल्हा परिषद अध्यक्षा समिधा नाईक, मुख्य कार्यकारी अधिकारी डॉ. हेमंत वसेकर यांनी आज पत्रकार परिषदेत दिली.

यावेळी उपाध्यक्ष राजेंद्र म्हापसेकर, वित्त व बांधकाम सभापती रवींद्र जठार, शिक्षण व आरोग्य सभापती सावी लोके, महिला व बाल कल्याण सभापती माधुरी बांदेकर, समाजकल्याण सभापती शारदा कांबळे, सामान्य प्रशासन उपमुख्य कार्यकारी अधिकारी राजेंद्र पराडकर, जिल्हा परिषद सदस्य सुनील म्हापणकर आदी उपस्थित होते. 
डॉ. वसेकर म्हणाले, ‘‘यशवंत पंचायत राज अभियान २०१८-१९ मध्ये सिंधुदुर्ग जिल्हा परिषद कोकण विभागात द्वितीय आली होती. कुडाळ पंचायत समिती कोकण विभागात प्रथम होती. त्यामुळे जिल्हा परिषद व कुडाळ राज्यस्तरीय मूल्यमापनसाठी पात्र ठरली होती.

हेही वाचा- नदीवर निघालेल्या माऊलीवर मुलाचा मृतदेह पाहण्याची वेळ

राष्ट्रीय स्तरावर यश मिळवण्यासाठी प्रयत्न

या मूल्यमापनमध्ये सिंधुदुर्ग जिल्हा परिषद व कुडाळ पंचायत समिती राज्यात प्रथम विजेती ठरली. कोल्हापूर व यवतमाळ जिल्हा परिषद अनुक्रमे द्वितीय व तृतीय विजेती ठरली आहे, असे यावेळी डॉ. वसेकर यांनी सांगितले. हे यश सर्व जिल्हा परिषद सदस्य, पदाधिकारी व लोकप्रतिनिधी तसेच अधिकारी-कर्मचारी यांच्या समन्वयाचे आहे.’’ मी आल्यावर जिल्ह्याला तिहेरी यश मिळाल्याचा मला आनंद होत आहे; पण आता राष्ट्रीय स्तरावर यश संपादन करण्यासाठी सर्वांनी प्रयत्न करुया, असे आवाहन त्यांनी केले.

हेही वाचा-  होळीसाठी कोकणात जाणाऱ्या चाकरमान्यांना खुशखबर

हा आमचा पायगुण आहे. यात सातत्य राखण्याचे काम आम्हाला करायचे आहे.
- राजेंद्र म्हापसेकर, उपाध्यक्ष, जिल्हा परिषद

हेही वाचा-  सातबारा संगणकीकरणात `हा` तालुका प्रथम

३९ लाखांचे बक्षीस
सिंधुदुर्ग जिल्हा परिषद यशवंत पंचायत राज अभियानमध्ये २००६-०७ मध्ये कोकण विभागात प्रथम व राज्यात तिसरी आली होती. २०१३-१४ मध्ये कोकण विभागात प्रथम व राज्यात तिसरी, २०१४-१५ मध्ये कोकण विभागात प्रथम व राज्यात तिसरी, २०१७-१८ मध्ये कोकण विभागात प्रथम व राज्यात दुसरी असा क्रमांक मिळविला आहे. या चार वर्षात जिल्हा परिषदेला ३९ लाख रुपयांची बक्षिसे मिळाली आहेत. आता २०१८-१९ मध्ये जिल्हा परिषद प्रथम आली आहे. यासाठी २५ लाखांचे राज्यस्तर बक्षीस मिळणार आहे, अशी माहिती अध्यक्षा नाईक यांनी दिली.