राजापूर (रत्नागिरी) : चिकन खाण्यामुळे कोरोना व्हायरस होत असल्याचे सोशल मिडीयावरून पसरलेल्या अफवेतून नुकसानीमध्ये खाईमध्ये लोटलेला पोल्ट्री व्यवसाय आता हळूहळू सावरू लागला आहे. ऐन शिमगोत्सवापासून चिकन खाण्यापासून लांब गेलेल्या खवय्यांची पावले पुन्हा एकदा पोल्ट्रीकडे वळू लागली आहेत. त्यातून, प्रतिकिलो पन्नास रूपयांपर्यंत घसरलेला चिकनचा दर वधारून दुप्पट होताना 110 रूपयांपर्यंत वाढला आहे. त्यामुळे गेले दोन महिने ठप्प झालेल्या पोल्ट्री व्यवसायामध्ये थोडी का असेना मात्र, उलाढाल होवू लागल्याने कोरोनामुळे आर्थिकदृष्ट्या कंबरडे मोडलेल्या पोल्ट्री व्यवसायिकांना दिलासा मिळाला आहे.

परजिल्ह्यातून विक्रीसाठी येणार्‍या कोंबड्या गेल्या काही महिन्यांपासून बंद झालेल्या आहेत. अशा स्थितीमध्ये राजापूर शहर आणि परिसरातील पोल्ट्री व्यवसायिकांकडे सद्यस्थितीमध्ये सुमारे दहा टक्के कोंबड्या विक्रीसाठी शिल्लक आहेत. त्या संपल्यानंतर मागणी असूनही विक्रीसाठी कोंबड्या नसल्याने व्यवसाय बंद करण्याची वेळ पोल्ट्री व्यवसायिकांवर येण्याची शक्यता आहे.  

हेही वाचा- खुशखबर : मच्छीमारांना मिळणार क्रेंद्र शासनाकडून विशेष सहाय्य.......

व्यवसायिकांचे कंबरडे मोडले

चिकन खाण्यामुळे कोरोना होत असल्याच्या सोशल मिडीयाच्या माध्यमातून पसरलेल्या अफवांचा पोल्ट्री व्यवसायावर प्रतिकूल परिणाम होवून जानेवारी महिन्यापासून पोल्ट्री व्यवसायातील आर्थिक उलाढाल ठप्प झाली होती. त्यानंतर, सातत्याने खालावत चाललेल्या उलाढालीमध्ये पन्नास रूपयांपर्यंत घसरलेल्या दराची भर पडली. त्यातून, पोल्ट्री व्यवसायिकांचे पुरते कंबरडे मोडून गेले. नुकसानीच्या खाईत लोटलेल्या व्यवसायिकांना नोकरदारांचे पगार देणेही मुश्किल झाले. मात्र, चिकन खाण्यामुळे कोरोना होत नसल्याचे स्पष्ट झाल्याने पुन्हा एकदा खवय्यांची पावले पोल्ट्रीकडे वळू लागली आहेत. सद्यस्थितीमध्ये चिकनच्या खरेदी-विक्रीतून फारशी उलाढाल होत नसली तरी, गेल्या काही महिन्यांतील नुकसानीची तूट भरून काढण्याच्यादृष्टीने मात्र, दिलासादायक आहे.  

हेही वाचा-Photo : जीवाची पर्वा न करता सांभाळली या चौघींनी संगमेश्वर तालुक्याची धुरा.....

चिकन खाण्याबाबतचे गैरसमज दूर झाले

कोरोनाच्या संभाव्य प्रादुर्भावामुळे लोकांनी चिकनकडे पाठ फिरवून पालेभाज्या खाण्याला अधिक प्राधान्य दिले होते. मात्र, चिकनमुळे कोरोना होत नसल्याचे स्पष्ट झाल्याने लोकांचे चिकन खाण्याबाबतचे गैरसमज दूर झाले आहेत. त्यामुळे गेल्या काही दिवसांपासून सातत्याने पालेभाज्या खाणार्‍या खवय्यांकडून आता चिकनची मागणी होवू लागली आहे. शहरासह ग्रामीण भागामध्ये त्यांचे प्रमाण वाढले आहे. संचारबंदीमुळे ग्रामीण भागातील लोकांना शहरामध्ये येणे शक्य होत नसल्याने त्यांच्याकडून गावठी कोंबड्यांची मागणी वाढली आहे. त्यातून, गावठी कोंबड्यांचे दरही दुुप्पट-तिप्पट झाले आहेत.  

हेही वाचा-महामार्गावर पोलिस अडवता ; मग यांनी केला रेल्वेरूळावरू५ दिवस प्रवास
होम डिलीव्हरी सर्व्हीस सुरु

“ सोशल मिडियावरील चिकनबाबत पसरलेला गैरसमज आता हळूहळू दूर होवू लागला आहे. त्यातून, पुन्हा एकदा लोकांकडून चिकनची मागणी होवू लागली आहे. पूर्वीच्या तुलनेमध्ये म्हणावीतशी फारशी उलाढाल होत नाही. मात्र, जी उलाढाल होते ती निश्‍चितच दिलासादायक आहे. घटललेल्या प्रतिकिलो दरामध्ये वाढ झाली असली तरी, लोकांना पोल्ट्री व्यवसायिकांकडून होम डिलीव्हरी सर्व्हीस दिली जात आहे. ”

गनी याहू, पोल्ट्री व्यवसायिक