गुहागर : मातीची भांडी बनविण्याचा वेगळा उद्योग गुहागरमध्ये आकाराला येतोय, ही आनंदाची गोष्ट आहे, असे रोजगार निर्मिती करणारे, पर्यावरणपूरक आणि प्रदूषणविरहित प्रकल्प कोकणातील पर्यटन समृद्ध करतील तसेच कोकणचा आर्थिक विकासही साधतील, असे मत राज्यमंत्री आदिती तटकरे यांनी व्यक्त केले.

हेही वाचा -  बापरे! तीन बिबटे चक्क अंगणात -

धोपावे येथील भूमि पॉटरी ॲण्ड क्‍ले स्टेशनला भेट दिल्यानंतर पत्रकारांशी बोलत होत्या. या वेळी तटकरे यांनी मातीपासून भांडी बनविण्याचा आनंद अनुभवला. तालुक्‍यातील धोपावेतील रसिका दळींनी बनवलेल्या फोल्डींगच्या गुढीला देश, विदेशातून मागणी आली. त्यानंतर त्यांनी रंगबिरंगी पणत्यांसोबत आयुर्वेदिक उटणे, साबण असे दिवाळीच्या सणात भेट देण्याचे पॅकेट तयार केले. त्यातूनच पुढे मातीची भांडी बनविण्याच्या उद्योगाला रसिका दळींनी सुरवात केली.

खादी ग्रामोद्योगच्या वेब पोर्टलवरील भूमि पोर्टरी ॲण्ड क्‍ले स्टेशनचा व्हिडिओ पाहिल्यापासून राज्यमंत्री तटकरेंनी धोपाव्यातील या उद्योगाला भेट देण्याचे निश्‍चित केले होते. दरम्यान, दळी कुटुंबासह राष्ट्रवादीचे जिल्हा उपाध्यक्ष पद्माकर आरेकर, तहसीलदार लता धोत्रे, अजय बिरवटकर, जिल्हा खादी ग्रामोद्योगचे अधिकारी, राजा आरेकर, भाजप जिल्हा उपाध्यक्ष किरण खरे, नगरपंचायत गटनेता उमेश भोसले, भाजप शहराध्यक्ष प्रकाश रहाटे, गटविकास अधिकारी अमोल भोसले, धोपावे सरपंच सदानंद पवार आदी उपस्थित होते.

हेही वाचा - अधिकारी आमदारांना भेटत नाहीत; शासनाची परिपत्रके काढून कारभार करतात -

उद्योग खाते मदत करेल

राज्यमंत्री आदिती तटकरे यांनी धोपावे येथील प्रकल्पाला भेट दिली. या वेळी रसिका दळी यांनी प्रकल्पाची माहिती दिली. तटकरे यांनी एका मशिनवर स्वतः हातात माती घेऊन भांडी तयार करण्याचा अनुभव घेतला. भविष्यात या प्रकल्पासाठी कोणतेही सहकार्य लागल्यास उद्योग खाते नक्कीच मदत करेल, अशी ग्वाही आदिती तटकरे यांनी दिली.

संपादन - स्नेहल कदम