IND vs NZ 1st Test Day 3 Live Updates : भारतीय संघाने पहिल्या डावात ३४५ धावा केल्या. त्यानंतर न्यूझीलंडच्या संघाने त्यांच्या पहिल्या डावात दमदार फलंदाजी केली. न्यूझीलंडचे सलामीवीर विल यंग आणि टॉम लॅथम दोघांनीही अर्धशतके ठोकून संघाला भक्कम सुरूवात दिली. ८९ धावांवर असताना यंग बाद झाला. त्याला अश्विनने माघारी धाडलं. पण त्यानंतर एक वेगळीच गोष्ट घडली. मैदानावरील वादांसाठी अनेकदा चर्चेत असलेल्या अश्विनचा आजही वाद घडला.

रविचंद्रन अश्विन गोलंदाजी करत होता. त्यावेळी टॉम लॅथम आणि केन विल्यमसनला गोलंदाजी करताना अश्विन स्टंपच्या रेषेत येऊन गोलंदाजी करताना दिसला. पंच नितीन मेनन यांनी त्याला अशा पद्धतीने गोलंदाजी करण्यापासून रोखण्याचा प्रय़त्न केला. खेळपट्टीवरील डेंजर एरिया म्हणजेच प्रतिबंधित क्षेत्राच्या जवळ तो गोलंदाजी करत असल्याने त्याला हटकलं गेलं. पण क्रिकेटच्या नियमानुसार तो योग्य पद्धतीने गोलंदाजी करत होता. त्यामुळे पंच आणि अश्विन यांच्यात काहीसा वाद झाल्याचे दिसले. वाद विकोपाला जातो की काय अशी भीती असतानाच अजिंक्य रहाणेने मध्यस्थी करत प्रकरण सांभाळण्यात आलं.