Asia Cup 2023 Jay Shah : पुढच्या वर्षीचा आशिया कप 2023 हा पाकिस्तानात होण्याची शक्यता आहे. त्यामुळे भारतीय संघ पुढचा आशिया कप खेळणार की नाही याबाबत साशंकता निर्माण झाली. टीम इंडिया पुढील वर्षी पाकिस्तानच्या भूमीवर जाणार की नाही यावर आता बीसीसीआय सचिव जय शाह यांनी मत व्यक्त केलं आहे.

जय शहा म्हणाले की, 'आशिया कप 2023 हा त्रयस्थ ठिकाणी होणार आहे. भारतीय संघ पाकिस्तानला जाणार की नाही याचा निर्णय सरकार घेईल. त्यामुळे आम्ही त्याच्यावर भाष्य करणार नाही. मात्र आशिया कप 2023 हा त्रयस्थ ठिकाणी होणार आहे हे ठरलं आहे.'

मुंबईत मंगळवारी भारतीय क्रिकेट नियामक मंडळाच्या (BCCI) वार्षिक सर्वसाधारण सभेनंतर बीसीसीआयने हा निर्णय घेतला. बीसीसीआयचे सचिव आणि एसीसीचे अध्यक्ष जय शाह म्हणाले, आशिया चषक त्रयस्थ ठिकाणी खेळवण्याचे जवळपास निश्चित झाले आहे आणि आम्ही निर्णय घेतला आहे की आम्ही ही स्पर्धा खेळण्यासाठी पाकिस्तानला जाणार नाही.

भारत आणि पाकिस्तान संघाने 2012-13 पासून द्विपक्षीय क्रिकेट मालिका खेळलेली नाही. या वर्षी खेळल्या गेलेल्या आशिया कपमध्ये भारत आणि पाकिस्तानचा संघ दोन वेळा एकमेकांविरुद्ध खेळला आहे. ज्यामध्ये भारताने एक सामना जिंकला होता तर पाकिस्तानने एका सामन्यात विजय मिळवला होता. ऑस्ट्रेलियात 23 ऑक्टोबरला होणाऱ्या टी-20 विश्वचषकात भारतीय संघ पाकिस्तानशी भिडणार आहे.