Cheteshwar Pujara Century After 4 Years : भारताचा वरिष्ठ कसोटीपटू चेतेश्वर पुजाराने अखेर आपला 4 वर्षे चाललेला शतकांचा दुष्काळ संपवला. त्याने बांगलादेशविरूद्धच्या पहिल्या कसोटीत दुसऱ्या डावात 102 धावा केल्या. पुजाराने पहिल्या डावात देखील 90 धावांची खेळी केली होती. मात्र तो 10 धावांनी शतकापासून वंचित राहिला होता. विशेष म्हणजे दुसऱ्या डावात पुजाराने आक्रमक फलंदाजीचे दर्शन घडवत युवा शुभमन गिलच्या स्ट्राईक रेटपेक्षा जास्ट स्ट्राईक रेट राखत शतक ठोकले. पुजाराने 130 चेंडूत आपले शतक पूर्ण केले. हे त्याच्या कारकिर्दितील सर्वात वेगवान शतक ठरले.

पुजाराला पहिल्या डावात 4 वर्षांनंतर कसोटी क्रिकेटमध्ये शतक झळकावण्याची संधी मिळाली होती, मात्र तो तसे करू शकला नाही. पुजाराला डावखुरा फिरकी गोलंदाज तैजुल इस्लामने क्लीन बोल्ड केले. पुजाराने जानेवारी 2019 मध्ये ऑस्ट्रेलियाविरुद्ध शेवटचे कसोटी शतक झळकावले होते. पुजाराने सिडनी कसोटीत 193 धावा केल्या. त्यानंतर पुजाराला आजपर्यंत शतक झळकावता आलेले नव्हते. अखेर हा दुष्काळ त्याने दुसऱ्या डावात संपवला. पुजाराने 130 चेंडूत शतकी खेळी केली. त्याने 78.46 च्या स्ट्राईक रेटने शतक ठोकले. तर युवा गिलने 72.37 च्या सरासरीने शतक ठोकले होते.

चेतेश्वर पुजाराने 130 चेंडूत नाबाद 102 धावा करत आपले सर्वात वेगवान शतक ठोकले. याचबरोबर भारताने आपला दुसरा डाव 2 बाद 258 धावांवर घोषित केला. आता बागंलादेशसमोर विजयासाठी 513 धावांचे आव्हान आहे.

हेही वाचा : काय आहे सलाम किंवा कुर्निसाताचे महत्त्व राजशिष्टाचारांमध्ये