पॅरा पॉवरलिफ्टर सुधीरने कॉमनवेल्थ गेम्समध्ये इतिहास रचला. त्याने भारतासाठी सुवर्णपदक जिंकून मोठी कामगिरी केली. सुधीरने 212 किलो वजन उचलून सुवर्णपदक पटकावले. या स्पर्धेत भारताने प्रथमच सुवर्णपदक जिंकले आहे. ऐतिहासिक कामगिरीनंतर सुधीरवर कौतुकाचा वर्षाव होत आहे. मात्र, इथपर्यंतचा त्याचा प्रवास खडतर आहे. ऐन उमिदेच्या काळात त्याला पोलिओसारख्या आजाराला सामोरं जावं लागलं.(Commonwealth Games 2022 gold medalist para powerlifter Sudhir story)

सुधीर सात वेळा राष्ट्रीय सुवर्णपदक विजेता ठरला आहे. सुधीरने दोनदा स्ट्रॉंगमॅन ऑफ इंडियाचा किताबही पटकावला आहे. हरियाणातील सोनीपत येथील लाठ गावात शेतकरी कुटुंबात जन्मलेला सुधीर लहानपणापासूनच हुशार होता. वयाच्या पाचव्या वर्षी पायाच्या त्रासामुळे तो अपंग झाला. सुधीर पोलिओचा बळी ठरला. असे असूनही त्याने हार मानली नाही. 2013 मध्ये त्याने शरीर तंदुरुस्त ठेवण्यासाठी पॉवरलिफ्टिंग सुरू केली. त्यात सततच्या सरावामुळे हा खेळ त्याच्या जीवनाचा भाग बनला.

पॅरा खेळाडू वीरेंद्र धनखड याच्याकडून प्रेरित होऊन सुधीरने पॅरा पॉवरलिफ्टिंग सुरू केले. अवघ्या दोन वर्षांच्या अथक परिश्रमाने तो राष्ट्रीय स्तरावर पोहोचला आणि राष्ट्रीय खेळांमध्ये सुवर्णपदक जिंकून राज्याच्या शिरपेचार मानाचा तुरा रोवला. येथूनच सुधीरच्या मनात आंतरराष्ट्रीय स्तरावर पदक जिंकण्याची आशा निर्माण झाली. सुधीर गेल्या सात वर्षांपासून पॉवरलिफ्टिंगमध्ये सुवर्णपदक जिंकत आहे.

सुधीरने २०२१ आणि २०२२ मध्ये स्ट्रॉंग मॅन ऑफ इंडिया हा किताब पटकावला. यानंतर त्याने बर्मिंगहॅम येथील राष्ट्रकुल स्पर्धेची तयारी सुरू केली. राष्ट्रकुल स्पर्धेत सुवर्ण कामगिरी करण्यासाठी तो दिल्लीत तयारी करत होता. रोज पाच तास तो सराव करत. सकाळी तीन तास आणि सायंकाळी दोन तास यशाला गवसणी घालण्यासाठी सुधीर रोज २५० किले वजन उचलत मेहनत घेत असत.

नेहमीच स्वदेशी खाद्यपदार्थांना प्राधान्य दिल्याचे सुधीरने सांगितले. आजही तो रोज पाच लिटर दूधासोबत हरभरा आणि बदाम खातो. यामुळे त्याचे शरीर पूर्णपणे नैसर्गिक राहते. तो इतर खेळाडूंनाही स्टिरॉइड्स न वापरण्याचा सल्ला देतो. पॅरिस पॅरा ऑलिम्पिकसाठी तो आधीच तयारी करत आहे. यासोबतच सुधीरने पुढील वर्षी होणाऱ्या हांगझोऊ आशियाई पॅरा गेम्ससाठीही पात्रता मिळवली आहे.