IND vs PAK, T20 World Cup 2021: भारतीय संघाला टी२० विश्वचषकाच्या सलामीच्या सामन्यात भारताविरूद्ध लाजिरवाण्या पराभवाला सामोरे जावे लागलं. भारताने विराट कोहलीच्या अर्धशतकाच्या जोरावर कशीबशी १५१ धावांपर्यंत मजल मारली होती. पण पाकिस्तानच्या सलामीवीरांनी मात्र दहा गडी राखून भारताचा पराभव केला. शाहीन शाह आफ्रिदीने दोन इनस्विंग चेंडूंवर भारताच्या दोन तगड्या सलामीवीरांना बाद केलं आणि त्या धक्क्यातून भारतीय संघ हवा तसा सावरूच शकला नाही. शाहीन आफ्रिदीच्या गोलंदाजीची रावळपिंडी एक्स्प्रेस शोएब अख्तरने तोंडभरून स्तुती केली.

"शाहीन शाह आफ्रिदी... अप्रतिम कामगिरी. चित्त्याच्या वेगाने गोलंदाजी करत तू दमदार पराक्रम करून दाखवलास. आफ्रिदीच्या दोन वेगवान गोलंदाजीपुढे भारताचा संघ पूर्णपणे उद्ध्वस्त झाला. त्याची स्पेल खरंच अप्रतिम होती. भारतीय गोलंदाजांनी आता थोडा विचार करायला हवा. कारण तुम्ही विरोधी संघाचा एकही गडी बाद करू शकलेला नाहीत. अशा वेळी तुम्ही स्वत:ला काय म्हणाल, याचा स्वत:च एकदा विचार करा. सध्याचा पाकिस्तानचा संघ कोणत्याही संघाला पराभवाचं पाणी पाजू शकतो", असा विश्वास पाकिस्तानचा माजी गोलंदाज शोएब अख्तरने यू ट्युबवरील व्हिडीओ दरम्यान व्यक्त केला.

पाहा शोएब अख्तरचा व्हिडीओ-

दरम्यान, भारतीय संघाने टॉस गमावल्यानंतर सामन्यातही टीम इंडियाची गडबडच उडाली. भारताचे दोन्ही सलामीवीर स्वस्तात बाद झाले. सूर्यकुमार यादवही पटकन बाद झाला. विराट कोहली (५७) आणि ऋषभ पंत (३९) यांच्या झुंजार खेळीमुळे भारताचा संघ १५१ धावांपर्यंत पोहोचला. पण पाकिस्तानसाठी हे आव्हान फार कठीण गेलं नाही. रिझवानने ५५ चेंडूत नाबाद ७९ तर बाबर आझमने ५२ चेंडूत नाबाद ६८ धावा केल्या आणि पाकिस्तानला ऐतिहासिक विजय मिळवून दिला.