French Open Badminton : सात्विक साईराज रंकीरेड्डी - चिराग शेट्टी या जोडीने पुरुषांच्या दुहेरीत शानदार कामगिरी करताना फ्रेंच ओपन बॅडमिंटन स्पर्धेत पुरुषांच्या दुहेरी विभागात उपांत्य फेरीपर्यंत मजल मारली. भारताची फुलराणी पी. व्ही. सिंधू हिला मात्र उपांत्यपूर्व फेरीच्या लढतीत पराभवाला सामोरे जावे लागल्यामुळे तिचे या स्पर्धेतील आव्हान शुक्रवारी संपुष्टात आले.

चीनच्या चेन फेई हिने टोकियो ऑलिंपिकमध्ये सुवर्णपदक पटकावले होते. त्यामुळे पी. व्ही. सिंधूसमोर कडवे आव्हान होते. पहिल्या गेममध्ये सिंधू हिने आपला खेळ उंचावला आणि २४-२२ अशी बाजी मारली. मात्र, त्यानंतर चेन हिने २१-१७, २१-१८ असे यश संपादन करीत या लढतीत विजय साकारला आणि अंतिम चारमध्ये प्रवेश केला. सिंधू हिचा एक तास व ३२ मिनिटांत पराभव झाला.

पी. व्ही. सिंधू - चेन फेई यांच्यामध्ये आतापर्यंत झालेल्या लढतींच्या निकषावर नजर टाकल्यास भारतीय खेळाडूकडे ६-५ अशी आघाडी होती. मात्र, सिंधू हिने चेन हिच्यावर अखेरचा विजय २०१९मध्ये जागतिक स्पर्धेत मिळवला होता. अखेरच्या दोन लढतींमध्ये तिला पराभवाचा सामना करावा लागला होता. या लढतीतही त्याचीच पुनरावृत्ती पाहायला मिळाली. सिंधूचा कडवा संघर्ष तिच्याकडून मोडून काढण्यात आला.

विजयी वाटचाल

सात्विक साईराज रंकीरेड्डी - चिराग शेट्टी या जोडीला मागील तीन स्पर्धांमध्ये जेतेपदापासून दूर राहावे लागत आहे; पण उपविजेतेपद नसे थोडके. भारतीय जोडीने आपला धडाकेबाज फॉर्म फ्रेंच ओपन स्पर्धेतही कायम राखला. दोन्ही खेळाडूंनी उपांत्यपूर्व फेरीच्या लढतीत सुपाक जोमखोह - के. केदरेन या जोडीवर २१-१९, २१-१३ असा ४२ मिनिटांत विजय संपादन केला व पुढे वाटचाल केली.