Gautam Gambhir Team India Coach: टी२० वर्ल्ड कप २०२४ स्पर्धेनंतर राहुल द्रविडचा भारतीय पुरुष क्रिकेट संघाचा मुख्य प्रशिक्षक म्हणून कार्यकाळ संपला. त्यामुळे आता त्याचा पुढचा वारसदार कोण असणार, याची चर्चा अनेक दिवसांपासून होत होती. अखेर ही जबाबदारी गौतम गंभीरच्या खांद्यावर आली आहे.

बीसीसीआयने मंगळवारी (९ जुलै) गौतम गंभीरला भारतीय संघाचा मुख्य प्रशिक्षक म्हणून नियुक्त केल्याची अधिकृत घोषणा केली आहे. बीसीसीआयचे सचिव जय शाह यांनी ट्वीट करत याबाबत माहिती दिली होती. त्यांनी त्यांच्या ट्वीटमध्ये म्हटले होते की गंभीर प्रशिक्षकपदाची महत्त्वाची भूमिका निभावण्यासाठी सर्वाधिक पात्र आहे.

गंभीरने या पदासाठी अर्ज केल्यानंतर बीसीसीआयच्या सल्लागार समितीला मुलाखातही दिली होती. त्यानंतर सल्लागार समितीने गंभीरला मुख्य प्रशिक्षक म्हणून निवडले आहे.

गौतम गंभीरचा कार्यकाळ

बीसीसीआयने दिलेल्या माहितीनुसार गंभीर २७ जुलैपासून सुरू होणाऱ्या भारताच्या श्रीलंका दौऱ्यापासून पदभार स्वीकारेल. या दौऱ्यात भारताला ३ वनडे आणि ३ टी२० सामन्यांच्या मालिका खेळायच्या आहेत.

गंभीरला बीसीसीआयने साडेतीन वर्षांसाठी म्हणजेच डिसेंबर २०२७ पर्यंत भारतीय संघाचा मुख्य प्रशिक्षक म्हणून नियुक्त केले आहे. गंभीर तिन्ही क्रिकेट प्रकारांसाठी भारतीय संघाचा प्रशिक्षक असणार आहे.

यशस्वी कारकिर्द

गौतम गंभीर मेंटॉर असताना नुकतेच आयपीएल २०२४ मध्ये कोलकाता नाईट रायडर्सने विजेतेपद जिंकले होते. पण आता गंभीरने भारतीय संघाचे प्रशिक्षकपद स्विकारल्याने त्याला कोलकाताच्या मेंटॉरपदाचा राजीनामा द्यावा लागला आहे.

गंभीरने यापूर्वी कर्णधार म्हणून २०१२ आणि २०१४ साली कोलकाता नाईट रायडर्सला आयपीएलचे विजेतेपद मिळवून दिले होते. तसेच २००७ टी२० वर्ल्ड कप आणि २०११ वनडे वर्ल्ड कप जिंकून देण्यातही गंभीरचे महत्त्वाचे योगदान राहिले आहे.

गौतम गंभीरने त्याच्या आंतरराष्ट्रीय कारकि‍र्दीत २४२ सामन्यांमध्ये १०३२४ धावा केल्या आहेत.