Vinod Kambli Sandeep Thorat : भारताचा माजी क्रिकेटपटू विनोद कांबळीने काही दिवसांपूर्वी आपण मोठ्या आर्थिक विवंचनेत असल्याचे सांगितले होते. त्याने एमसीएकडे नोकरीची मागणी देखील केली होती. तो उदरनिर्वाहासाठी सध्या बीसीसीआयच्या पेन्शनवरच अवलंबून असल्याचे म्हणाला होता. त्यावेळी त्याला मराठी उद्योजक संदीप थोरात (Businessmen Sandeep Thorat) यांनी 1 लाख महिना पगाराची नोकरी ऑफर (Job Offer) केली होती.

विशेष म्हणजे त्यानंतर बरेच दिवस विनोद कांबळीने ही नोकरी स्विकारली की नाही याबाबत माहिती मिळत नव्हती. मात्र आता सह्याद्री मल्टिसिटी फायनान्स कंपनीचे चेअरमन संदीप थोरात यांनी विनोद कांबळीला थेट त्याच्या घरी जावून ऑफर लेटर दिले. त्यानंतर विनोद कांबळीने थोरात यांची नोकरीची ऑफर आपण स्विकारली असल्याचे सांगितले. आता विनोद कांबळी सह्याद्री मल्टिसिटी फायनान्स कंपनीच्या मुंबई शाखेत मानद संचालक पदावर कार्यरत होईल.

भारताचा माजी क्रिकेटपटू विनोद कांबळीची घरची परिस्थिती बेताचीच होती. मात्र विनोद कांबळीने जिद्दीने क्रिकेटमध्ये आपली कारकिर्द घडवत भारतीय संघात स्थान मिळवले. मात्र गेल्या काही दिवसांपासून विनोद कांबळी पुन्हा एकदा आर्थिक अडचणीत सापडला होता. कोरोना काळानंतर त्याच्या हातात काम नव्हते. सचिनबरोबरच आपल्या क्रिकेटच्या कारकिर्दिला सुरूवात करणाऱ्या विनोद कांबळीची जीवनशैली कायम वादाच्या भोवऱ्यात सापडली आहे.

विनोद कांबळीने एका मुलाखतीत सांगितले होते की, तो मुश्किलीने आपले कुटुंब चावलत आहे. मला नोकरीची गरज आहे. विनोदने मुंबई क्रिकेट असोसिएशनकडे नोकरीची मागणी केली होती. मात्र त्यांच्याकडून अद्याप तरी कोणता प्रतिसाद आलेला नाही. विनोद कांबळीने कसोटीत भारताकडून सर्वात वेगाने 1 हजार धावा करण्याचा विक्रम देखील आपल्या नावावर केला आहे. त्याने सर डॉन ब्रॅडमन यांच्यापेक्षा फक्त एक डाव जास्त खेळून कसोटीत 1000 धावा पूर्ण केल्या होत्या.