क्रिकेटच्या इतिहासात पहिल्यांदाच एखाद्या क्रिकेट लीगमध्ये 35 देशातील खेळाडू सहभागी होणार आहेत. विशेष म्हणजे ही लीग स्पर्धात पुरुषांची नसून ती महिलांची असणार आहे. ही ऐतिहासिक फ्रेंचायझी लीग दुबईच्या मैदानात खेळवण्यात येणार आहे. यात भारतीय महिला खेळाडूंचा मात्र सहभाग असणार नाही. दुबईमध्ये 1 मे पासून या स्पर्धेला सुरुवात होणार आहे. लैंगिक समानता मोहिमेत आघाडीवर असलेल्या फेयरब्रेकच्या पुढाकाराने होणाऱ्या स्पर्धेत 15 दिवसात 19 सामने खेळवण्यात येणार आहेत.

भारतीय संघाची स्टार खेळाडू हरमनप्रीत कौर, जेमिमा रोड्रिग्ज आणि दीप्ति शर्मा यासारख्या भारतीय खेळाडू या स्पर्धेत सहभागी होणार होत्या. पण बीसीसीआय (BCCI) ने सीनियर महिला राष्ट्रीय टी-20 स्पर्धा याच कालावधीत असल्यामुळे भारतीय खेळाडूंना एनओसी (NOC) देण्यास नकार दिल्याचे समजते. ही स्पर्धा दुबईच्या मैदानात होणार असली तरी याचे यजमानपद हे हाँकाँगकडे असेल. कोरोनाच्या नियमालीमुळे ही स्पर्धा दुबईला स्थलांतरित करण्यात आली आहे.

या स्पर्धेत करारबद्ध झालेल्या 90 खेळाडूंमध्ये 40 खेळाडू हे पूर्णवेळ सदस्य असलेल्या देशांचे आहेत. न्यूझीलंड संघाची कर्णधार सोफी डिवाइन, दक्षिण आफ्रिकेची कर्णधार सुने लुस, वेस्टइंडीजची अष्टपैलू डिएंड्रा डॉटिन आणि कीवी स्टार बॅटर सुजी बेट्स यासारख्या दिग्गज महिला खेळाडू स्पर्धेत सहभाग घेणार आहेत.

स्पर्धेत सहभागी 90 खेळाडूंना सहा संघात विभागण्यात येईल. कोणत्या संघाकडून कोण खेळणार याची यादी अद्याप समोर आलेली नाही. लवकरच ही माहिती जाहीर केली जाईल. वेस्टइंडीजची कर्णधार स्टेफनी टेलर टॉर्नेडोज या संघाचे नेतृत्व करणार असल्याची चर्चा आहे.