भारताचा अष्टपैलू खेळाडू हार्दिक पांड्याला (Hardik Pandya) भारताच्या कसोटी, वनडे आणि आता टी 20 संघात देखील स्थान मिळालेले नाही. हार्दिक पांड्याने रणजी ट्रॉफीमधून (Ranji Trophy) देखील माघार घेतली आहे. सध्या क्रिकेट (Cricket) सामन्यांपासून दूर असलेला हार्दिक पांड्या आपल्या कुटुंबासोबत वेळ घालवत आहे. आपला मुलगा अगस्त्याबरोबर (Agastya) तो मजा मस्ती करत असलेला व्हिडिओ सध्या सोशल मीडियावर व्हायरल होत आहे.

हार्दिक पांड्या अष्टपैलू म्हणून संघात स्थान मिळवण्यास अजून फिट (Hardik Pandya Fitness) नाही. तो पाठीच्या दुखापतीनंतर सामन्यात गोलंदाजी करताना फारसा दिसलेला नाही. त्यामुळे त्याला भारतीय संघातील आपले स्थान देखील गमावावे लागले आहे. तो यापूर्वी भारताकडून टी 20 वर्ल्डकपमध्ये शेवटचा खेळताना दिसला होता. त्याला न्यूझीलंड, दक्षिण आफ्रिका, वेस्ट इंडीज आणि आता श्रीलंकेविरूद्धच्या मालिकेसाठी देखील संघात स्थान देण्यात आलेले नाही. दरम्यान, हार्दिक पांड्याने रणजी ट्रॉफीमधूनही माघार घेतली आहे. त्यामुळे आता तो थेट आयपीएलमध्येच (IPL) खेळताना दिसणार आहे. सध्या हार्दिक आपल्या मुलासोबत वेळ घालवत आहे.

त्याने आपल्या इन्स्टाग्रामवर मुलगा अगस्त्या आणि तो स्विमिंग पूलमध्ये मजामस्ती करत असलेला व्हिडिओ शेअर केला. या व्हिडिओला त्याने 'कूलेस्ट वॉटर बेबी' असे कॅप्शन दिले आहे.

निवडसमिती अध्यक्ष चेनत शर्मा (Chetan Sharma) यांनी श्रीलंका दौऱ्यासाठी संघाची घोषणा केल्यानंतर त्यांना हार्दिक पांड्याबाबत देखील प्रश्न विचारण्यात आला. त्यावेळी त्यांनी हार्दिक पांड्याचा ज्यावेळी तो 100 फिट होईल त्यावेळीच विचार केला जाईल असे सांगितले. ते म्हणाले की, 'निश्चितच हार्दिक पांड्या टीम इंडियाचा एक महत्वाचा भाग आहे. ज्यावेळी तो 100 टक्के फिट होईल आणि गोलंदाजी (Hardik Pandya Bowling) करायला लागले त्यावेळी त्याला पुन्हा संघात स्थान देण्याबाबत विचार केला जाईल.'