Ind vs Aus 1st Test : कसोटी असो वा वनडे किंवा मग टी२० सामना. विदर्भ क्रिकेट संघटनेचे जामठा स्टेडियम भारतासाठी नेहमीच ''लकी'' राहिले आहे. या स्टेडियमवर आतापर्यंत झालेल्या सहापैकी चार कसोटी सामन्यांमध्ये टीम इंडियाने बाजी मारून आपली दादागिरी कायम ठेवली आहे.

बॉर्डर-गावसकर चषक क्रिकेट कसोटी मालिकेतील भारत आणि ऑस्ट्रेलिया यांच्यातील पहिली महत्त्वपूर्ण लढत येत्या गुरुवारपासून जामठा स्टेडियमवर खेळली जाणार आहे. २००८ मध्ये बांधण्यात आलेल्या जामठा स्टेडियमचा आतापर्यंतचा इतिहास बघितल्यास येथे यजमान भारताचेच वर्चस्व राहिल्याचे दिसून येते.

या स्टेडियमवर २००८ पासून आतापर्यंत एकूण सहा कसोटी सामने खेळले गेले. यातील सर्वाधिक चार सामने भारताने मोठ्या फरकाने जिंकले आहेत. तर एका लढतीत संघाला दक्षिण आफ्रिकेकडून पराभव स्वीकारावा लागला. फेब्रुवारी २०१० मध्ये झालेला इंग्लंडविरुद्धचा कसोटी सामना अनिर्णित सुटला.

उल्लेखनीय म्हणजे, या मैदानावरील पहिल्याच कसोटी सामन्यात भारताने कांगारूंना १७२ धावांनी धूळ चारली होती. याआधी सलग दोन कसोटींमध्ये दक्षिण आफ्रिका आणि श्रीलंका संघांना पराभूत केल्याने, यावेळी ऑस्ट्रेलियाविरुद्ध भारताला विजयी हॅटट्रिकची संधी राहणार आहे. घरच्या मैदानावरील अनुकूल वातावरण व खेळाडूंचा फॉर्म लक्षात घेता भारतीय संघाला विजयापासून रोखणे कांगारुंना निश्चितच कठीण जाणार आहे.