ऑस्ट्रेलियाविरुद्धच्या कसोटी मालिकेची तयारी करीत असलेला भारतीय क्रिकेट संघाचा प्रमुख फलंदाज विराट कोहलीला सामन्यापूर्वीच धक्का बसला. विराटचा महागडा नवीन मोबाईल अचानक गायब झाला. ही माहिती स्वतः विराटने ट्विटरवरून शेअर केली. यामुळे पोलिसही बुचकाळ्यात पडले आहेत. मात्र, या प्रकरणी अद्याप पोलिसात तक्रार झाली नाही.

भारतीय खेळाडू मंगळवारी जामठा स्टेडियमवर सरावाला जाण्याच्या तयारीत असताना विराटला त्याचा मोबाईल गायब झाल्याचे लक्षात आले. त्याने लगेच ही बातमी ट्विटरवरून शेअर केली. ‘नथिंग बिट्स दी सॅड फिलिंग ऑफ लुझींग युअर न्यू फोन विदाऊट इव्हन अनबॉक्सिंग इट, हॅज एनीवन सीन इट?’ अशा आशयाचे ते ट्विट होते.

विराटचा नवाकोरा फोन हरवल्याची वार्ता शहरात वाऱ्यासारखी पसरली. यामुळे संपूर्ण शहर पोलिस दलात एकच खळबळ उडाली. मात्र, याबाबत स्वत: कोहली किंवा संघ व्यवस्थापनाने अद्याप कोणतीही पोलिस तक्रार केलेली नाही. त्यामुळे याबाबत गोंधळ निर्माण झाला आहे. ‘या ट्विटची आम्ही चौकशी केली. सहसा क्रिकेटपटूंचे लायझनिंग अधिकारी खेळाडूंच्या सुरक्षाव्यवस्थेत काही अडचणी निर्माण झाल्यास आम्हाला माहिती देतात.

आम्ही यासंदर्भात त्यांच्याकडे विचारणा केली. मात्र, त्यांच्याकडून दुजोरा मिळाला नाही. तसेच विराटकडूनही फोन हरविल्याबाबतची लेखी अथवा तोंडी तक्रार आम्हाला प्राप्त झाली नसल्याचे पोलिस अधिकाऱ्यांनी सांगितले. विराटचा मोबाईल हरवला की कुणी चोरला, हेही कळू शकले नाही. उल्लेखनीय म्हणजे, काही वर्षांपूर्वी उत्तरप्रदेशचा रणजीपटू प्रवीण कुमारची तब्बल साडेसात लाख रुपये किंमतीची सोन्याची चेन जुन्या व्हीसीए मैदानावरून चोरट्याने लंपास केली होती.