India vs Bangladesh ODI : भारत आणि बांगलादेश यांच्यातील तीन एकदिवसीय सामन्यांच्या मालिकेतील पहिला सामना ढाका येथील शेर-ए-बांगला स्टेडियमवर खेळला गेला. हा रोमांचक सामना बांगलादेशने एका विकेटने जिंकला. या पराभवानंतर टीम इंडियाला आणखी एक धक्का बसला आहे. ICC ने सोमवारी भारतीय क्रिकेट संघाला पहिल्या एकदिवसीय सामन्यात स्लो ओव्हर रेटसाठी त्यांच्या मॅच फीच्या 80 टक्के दंड ठोठावला आहेत.

आयसीसीने एका निवेदनात म्हटले आहे. मॅच रेफरी रंजन मदुगले यांना आढळले की टीम इंडियाने पहिल्या वनडेमध्ये निर्धारित वेळेपेक्षा चार षटके कमी टाकली आहेत. याच कारणामुळे टीम इंडियाला शिक्षा झाली आहे. आयसीसीने म्हटले की, नियम 2.22 नुसार, खेळाडूंना त्यांच्या संघाच्या निर्धारित वेळेत प्रत्येक षटकाच्या विलंबासाठी त्यांच्या मॅच फीच्या 20 टक्के दंड आकारला जातो.

आयसीसीने सांगितले की कर्णधार रोहित शर्माने चूक मान्य केली असून प्रस्तावित शिक्षाही मान्य केली आहे. त्यामुळे औपचारिक सुनावणीची गरज नव्हती. मैदानावरील पंच मायकेल गॉफ आणि तनवीर अहमद, तिसरे पंच शरफुडोला इब्ने शाहिद आणि चौथे पंच गाझी सोहेल यांनी हा आरोप लावला.

सामन्याबद्दल बोलायचे झाले तर भारतीय संघ 41.2 षटकात 186 धावांवर गारद झाला. रोहित शर्माने 27, श्रेयस अय्यरने 24 आणि वॉशिंग्टन सुंदरने 19 धावा केल्या. याशिवाय शिखर धवनने सात आणि विराट कोहलीने नऊ धावा केल्या. शाहबाज अहमद आणि दीपक चहर यांना खातेही उघडता आले नाही. बांगलादेशकडून शाकिब अल हसनने पाच आणि इबादत हुसेनने चार विकेट घेतल्या. प्रत्युत्तरात बांगलादेशने 46 षटकांत नऊ गडी गमावून लक्ष्य गाठले. कर्णधार लिटन दासने 41 धावा केल्या. त्याचवेळी मेहदीने 38 धावांची नाबाद खेळी खेळली.