Ind vs Nz World Cup Semi Final 2023 : रोहित शर्माच्या नेतृत्वाखालील टीम इंडियाने वर्ल्ड कप 2023 च्या उपांत्य फेरीत न्यूझीलंडचा 70 धावांनी पराभव करत थाटात फायनलमध्ये एन्ट्री मारली. भारताने 2011 च्या वर्ल्ड कप स्पर्धेच्या अंतिम फेरीत श्रीलंकेचा पराभव करून दुसरे विजेतेपद पटकावले होते. आता टीम इंडियाने 12 वर्षांनंतर अंतिम फेरीत प्रवेश केला आहे.

न्यूझीलंडविरुद्धच्या या सेमीफायनलमध्ये भारताच्या विजयाचे तीन हिरो होते. कर्णधार रोहित शर्मा लवकर बाद झाल्यानंतर विराट कोहलीने डावाची धुरा सांभाळली आणि वनडे कारकिर्दीतील 50 वे ऐतिहासिक शतक झळकावले. यानंतर श्रेयस अय्यरने झंझावाती पद्धतीने शतक पूर्ण करत भारताची धावसंख्या 397 धावांपर्यंत नेली. गोलंदाजीत मोहम्मद शमीने 7 विकेट घेत भारताला सामना जिंकून दिला. तिन्ही खेळाडूंची कामगिरी उत्कृष्ट होती, पण शमीला त्याच्या 7 विकेट्ससाठी सामनावीराचा पुरस्कार देण्यात आला.

मोहम्मद शमीने 7 विकेट्स घेऊन अनेक विक्रम केले. वर्ल्ड कपमधील बाद फेरीत 7 विकेट घेणारा तो पहिला गोलंदाज ठरला. याशिवाय, त्याच्या वर्ल्ड कप कारकिर्दीतील हे चौथे 5 बळी ठरले आणि वर्ल्ड कप स्पर्धेत अशी कामगिरी करणारा तो पहिला गोलंदाज ठरला.

वर्ल्ड कप स्पर्धेत सर्वाधिक 23 बळी घेणारा शमी हा भारतीय गोलंदाज ठरला आहे. यापूर्वी हा विक्रम झहीर खान (21) च्या नावावर होता.