India Legends vs South Africa Legends : रोड सेफ्टी वर्ल्ड सिरीज 2022 मध्ये कानपूरच्या ग्रीन पार्क स्टेडियमवर इंडिया लिजेंड्स आणि दक्षिण आफ्रिका लीजेंड्स यांच्यात सामना खेळला गेला. इंडिया लिजेंड्सने या सामन्यात दक्षिण आफ्रिका लिजेंड्सचा 61 धावांनी पराभव केला. इंडिया लिजेंड्सने रोड सेफ्टी वर्ल्ड सीरिजमध्ये विजयासह आपल्या मोहिमेची सुरुवात केली आहे.

नाणेफेक जिंकून फलंदाजीचा निर्णय घेतलेल्या इंडिया लिजेंड्सने सुरुवात चांगली झाली. सचिन तेंडुलकर आणि नमन ओझा यांच्यात पहिल्या विकेटसाठी 46 धावांची भागीदारी केली. यानंतर सचिन तेंडुलकर 15 चेंडूत 16 धावा करून बाद झाला. पुढच्याच षटकात नमनही 21 धावा काढून पॅव्हेलियनमध्ये परतला. सुरेश रैनाने 22 चेंडूत 33 धावांची दमदार खेळी केली. युवराजने 8 चेंडूत 6 धावा केल्या. युसूफ पठाणने 12 चेंडूत 25 धावांचे योगदान दिले. भारताने शेवटच्या पाच षटकात 80 पेक्षा जास्त धावा केल्या. स्टुअर्ट बिन्नीने 42 चेंडूत 5 चौकार आणि 6 षटकारांच्या मदतीने 82 धावांचे तुफानी अर्धशतक झळकावले. इंडिया लिजेंड्सने 20 षटकांत दक्षिण आफ्रिका लिजेंड्सला 217 धावांचे मोठे लक्ष्य दिले.

दुसरीकडे लक्ष्याचा पाठलाग करताना दक्षिण आफ्रिका लिजेंड्सला केवळ 156 धावा करता आल्या. इंडिया लिजेंड्सने हा सामना 61 धावांनी जिंकला. भारताकडून राहुल शर्माने चार षटकांत १७ धावा देत तीन बळी घेतले, तर मुनाफ पटेल आणि प्रज्ञान ओझा यांनी प्रत्येकी दोन बळी घेतले. याशिवाय इरफान पठाण आणि युवराज सिंगनेही प्रत्येकी एक विकेट घेतली.

रोड सेफ्टी वर्ल्ड सिरीज 2022 मध्ये एकूण 8 संघ सहभागी होत आहेत, जे 4 शहरांमध्ये एकूण 23 सामने खेळणार आहेत. सहभागी संघांमध्ये इंडिया लिजेंड्स, दक्षिण आफ्रिका लीजेंड्स, वेस्ट इंडिज लीजेंड्स, ऑस्ट्रेलिया लीजेंड्स, श्रीलंका लीजेंड्स, बांगलादेश लीजेंड्स, इंग्लंड लीजेंड्स आणि न्यूझीलंड लीजेंड्स यांचा समावेश आहे. लोकांमध्ये रस्ता सुरक्षेबाबत जनजागृती करणे हा या स्पर्धेचा उद्देश आहे.