LSG vs GT IPL 2023 Hardik Pandya : लखनौ सुपर जायंट्स विरूद्धच्या सामन्यात गुजरातने प्रथम फलंदाजी करताना 20 षटकात 6 बाद 135 धावांपर्यंत मजल मारली. कर्णधार हार्दिक पांड्याने 50 चेंडूत 66 धावांची दमदार खेळी केली. तर सलामीवीर वृद्धीमान साहाने 47 धावा करत मोलाचे योगदान दिले. मात्र साहा आणि पांड्याने चांगली सुरूवात करून देखील मधल्या षटकांमध्ये गुजरातची गाडी अडली होती. त्यांना 16 षटके झाली तरी शतक पार करता आले नाही. अखेर हार्दिक पांड्याने आपला गिअर बदलला आणि गुजरातचा जीव भांड्यात पडला.

लखनौ सुपर जायंट्सचा डावखुरा फिरकी गोलंदाज क्रुणाल पांड्याने दुसऱ्याच षटकात गुजरातचा सलामीवीर शुभमन गिलला शुन्यावर बाद करत मोठा धक्का दिला होता. मात्र त्यानंतर वृद्धीमान साहा आणि हार्दिक पांड्याने गुजरातला आक्रमक सुरूवात करून दिली. यात साहाचा मोठा वाटा होता. त्यांनी पॉवर प्लेमध्ये गुजरातला 39 धावांपर्यंत पोहचवले. यात 34 धावांचे योगदान एकट्या वृद्धीमान साहाचे होते.

पॉवर प्लेमध्ये वृद्धीमान साहाने धडाकेबाज फलंदाजी केली होती. त्यानंतर हार्दिक पांड्याने आपला गिअर बदलला. त्याने साहासोबतची भागीदारी अर्धशतक पार पोहचवत संघाला 10 षटकात 70 धावांचा टप्पा पार करून दिला. वृद्धीमान साहाला कृणाल पांड्याने 47 धावांवर बाद केले. साहाचे अर्धशतक अवघ्या 3 धावांनी हुकले. पांड्याने साहा आणि हार्दिकची दुसऱ्या विकेटसाठीची 68 धावांची भागीदारी तोडत आपली दुसरी शिकार केली.

वृद्धीमान साहा 47 धावांवर बाद झाल्यानंतर आलेला अभिनव मनोहर 3 धावांची भर घालून परतला. त्याला अमित मिश्राने बाद केले. तर नवीन उल हकने विजय शंकरला 10 धावांवर बाद केले. दरम्यान, गुजरातची धावगती देखील मंदावली. 16 षटके झाली तरी गुजरातला शंभरी पारी करता आली नव्हती. हार्दिक पांड्या देखील बॉल टू रन खेळत होता.

अखेर बॉल टू रन खेळणाऱ्या हार्दिक पांड्याने शेवटची काही षटके शिल्लक राहिले असताना आपला गिअर बदलला. त्याने आपले अर्धशतक पूर्ण करत संघाला 125 धावांच्या जवळ पोहचवले. मात्र 20 व्या षटकात तो 50 चेंडूत 66 धावा करून बाद झाला. त्यानंतर गुजरातने 20 षटकात 6 बाद 135 धावांपर्यंत मजल मारली.

(Sports Latest News)