Harshal Patel Beautiful Bowled Ken Williamson Video : आयपीएल स्पर्धेत धमाकेदार कामगिरी करुन सर्वाधिक विकेट घेणाऱ्या हर्षल पटेलनं हैदराबाद विरुद्धच्या सामन्यात महत्त्वाची जोडी फोडली. त्याने सलामीवीर जेसन रॉयच्या साथीनं अर्धशतकी खेळी करुन संघाचा डाव सावरणाऱ्या केन विल्यमसनला बोल्ड केले. हैदराबादच्या डावातील 12 व्या आणि आपल्या वैयक्तिक दुसऱ्या ओव्हरमध्ये हर्षलनं संघाला महत्त्वपूर्ण विकेट मिळवून दिली.

नाणेफेक गमावल्यानंतर सनरायझर्स हैदराबादच्या संघाने सलामी जोडीत बदलाचा प्रयोग केल्याचे पाहायला मिळाले. वृद्धिमान साहाच्या जागी जेसन रॉयसोबत अभिषेक शर्माने संघाच्या डावाची सुरुवात केली. अभिषेकनं आक्रमक सुरुवात केली. पण धावफलकावर अवघ्या 14 धावा असताना तो मोठा फटका खेळण्याच्या नादात झेलबाद झाला. त्याची विकेट पडल्यानंतर कर्णधार केन विल्यमसन मैदानात उतरला.

केन विल्यमसन आणि जेसन रॉय या जोडीनं दुसऱ्या विकेटसाठी 70 धावांची खेळी केली. ही जोडी बंगळुरुसाठी डोकेदुखी ठरत असताना हर्षल पटेलनं संघाला महत्त्वपूर्ण विकेट मिळवून दिली. जबरदस्त इनस्विंगवर केन विल्यमसन सपशेल सरेंडर केल्याचे पाहायला मिळाले.

सनरायझर्स हैदराबादचा स्पर्धेतील प्रवास कधीच संपुष्टात आला आहे. उर्वरित सामने जिंकून शेवट गोड करण्याच्या इराद्याने ते मैदानात उतरले आहेत. दुसरीकडे विराट कोहलीच्या नेतृत्वाखालील रॉयल चॅलेंजर्स बंगळुरुने प्ले ऑफमध्ये स्थान पक्के केले आहे. उर्वरित दोन सामन्यातील विजयासह ते गुणतालिकेत दुसऱ्या स्थानावर पोहचण्यासाठी प्रयत्नशील आहेत.