आयपीएल 2022 मधील (IPL 2022) नवा संघ गुजरात टायटन्स आपला पहिला सामना उद्या दुसरा नवा संघ लखनौ सुपर जायंटबरोबर खेळणार आहे. दरम्यान, गुजरात टायटन्सने (Gujarat Titans) आपल्या पहिल्या सामन्यापूर्वी आपला उपकर्णधार (Vice-Captain) निवडला आहे. गुजरात टायटन्सने अफगाणिस्तानचा दिग्गज लेग स्पिनर राशिद खानकडे (Rashid Khan) ही नवी जबाबदारी सोपवली आहे. तो आता हार्दिक पांड्याचा डेप्युटी असणार आहे. याबाबतचा एक व्हिडिओ गुजरातने आपल्या ट्विटर अकाऊंटवरून शेअर केला.

गुजरात टायटन्सने लिलावापूर्वी हार्दिक पांड्या, शुभमन गिल आणि राशिद खान यांना आपल्या गोटात खेचण्यात यश मिळवले होते. हार्दिक पांड्या नवा गुजरातचा संघ लीड करणार हे आधीच स्पष्ट झाले होते. मात्र उपकर्णधाराबाबत गुजारात टायटन्सने अजूनपर्यंत कोणतीही घोषणा केली नव्हती. गुजरात 28 मार्चला आपला पहिला सामना खेळणार आहे. त्यापूर्वी एक दिवस आधी आज गुजरातने आपल्या उपकर्णधाराची घोषणा केली.

अफगाणिस्तानने आयपीएलमध्ये आतापर्यंत 93 विकेट घेतल्या आहेत. तो बऱ्याच काळापासून सनरायजर्स हैदराबादकडून खेळत होता. मात्र आयपीएलच्या 2022 च्या मेगा लिलावापूर्वीच गुजरात टायटन्सने राशिद खानला विकत घेतले. गुजरात टायटन्स आपला पहिला सामना लखनौ सुपर जायंटबरोबर खेळणार आहे. लखनौच्या संघाचे नेतृत्व केएल राहुल करणार आहे.