मुंबई : आयपीएलच्या 15 व्या हंगामात मुंबई इंडिन्स (Mumbai Indians) आणि चेन्नई सुपर किंग्ज (Chennai Super Kings) पहिल्यांदाच भिडले. समोर चेन्नई सारखा कट्टर प्रतिस्पर्धी पाहून मुंबई आपल्या खेळात सुधारणा करेल असे वाटत होते. मात्र मुंबईचे येरे माझ्या मागल्या सुरूच राहिले. प्रथम गोलंदाजी करणाऱ्या सीएसकेने मुंबईची पहिल्याच षटकात 2 बाद दोन धावा अशी अवस्था केली. मुकेश चौधरीने (Mukesh Choudhary) दुसऱ्या चेंडूवर रोहित शर्माची शिकार केली. त्यानंतर पाचव्या चेंडूवर इशान किशनचा (Ishan Kishan) उत्तम यॉर्करवर त्रिफळा उडवला.

विशेष म्हणजे इशान किशनचा अर्जुन तेंडुलकरने (Arjun Tendulkar) सरावावेळी अशाच प्रकारे किशनची दांडी गुल केली होती. अर्जुनने एक प्रकारे इशान किशनला सामन्यात काय होऊ शकते याची हिंट दिली होती. मात्र इशान किशनच्या डोक्यात हे शिरलेच नसल्याचे दिसते. कारण सामन्याच्या पाचव्याच चेंडूवर मुकेश चौधरी या सीएसकेच्या डावखुऱ्या वेगावान गोलंदाजाने इशान किशनचा अर्जुन तेंडुलकर सारखाच त्रिफळा उडवला.

प्रथम गोलंदाजी करणाऱ्या चेन्नईने मुंबईला पहिल्याच षटकात दोन धक्के दिले. मुकेश चौधरीने पहिल्या षटकाच्या दुसऱ्या चेंडूवर रोहित शर्माला शुन्यावर बाद केले. त्यानंतर याच षटकाच्या पाचव्या चेंडूवर इशान किशन देखील बाद झाला. मुकेश चौधरीने त्यानंतर डेवाल्ड ब्रेविसला 4 धावांवर बाद केलं. मुंबईची टॉप ऑर्डर ढासळल्यानंतर सूर्यकुमार यादवने संघाला सावरण्याचा प्रयत्न केला. मात्र मोईन अलीच्या जागेवर आलेल्या सँटनरने त्याला 32 धावांवर बाद करत मुंबईला मोठा धक्का दिला.