Rohit Sharma - Mayank Agarwal: इंडियन प्रीमियर लीग २०२४ स्पर्धेत मुंबई इंडियन्स विरुद्ध सनरायझर्स हैदराबाद संघात बुधवारी सामना होणार आहे. हा सामना हैदराबादमधील राजीव गांधी आंतरराष्ट्रीय क्रिकेट स्टेडियमवर होणार आहे. त्यामुळे दोन्ही संघ हैदराबादमध्ये पोहचले आहेत.

दरम्यान, दोन्ही संघाचा सराव सुरु असताना मुंबई इंडियन्सचा माजी कर्णधार रोहित शर्मा सनरायझर्स हैदराबादचा सलामीवीर मयंक अग्रवालशी मस्ती करताना दिसला.

झाले असे की रोहित आणि मयंक हे चांगले मित्र देखील आहेत. त्यामुळे ते सरावादरम्यान एकमेकांना भेटले होते. यावेळी मस्तीमध्ये रोहित मयंकला फ्लाईंग किस देताना दिसला.

दरम्यान, रोहितने दिलेल्या या फ्लाईंग किसचा संबंध अनेक चाहत्यांनी हर्षित राणा आणि मयंक अग्रवाल यांच्याच झालेल्या वादग्रस्त घटनेशी जोडला आहे. चाहत्यांनी कयास लावला आहे की रोहित हर्षित राणाच्या फ्लाईंग किसची आठवण मयंक अग्रवालला करून देत मस्ती करत आहे.

हर्षित राणा अन् मयंक अग्रवाल यांच्यात नक्की काय झालेलं?

कोलकाता नाईट रायडर्स आणि सनराझर्स हैदराबाद यांच्यात इडन गार्डन्स संघात कोलकातामध्ये २३ मार्चला सामना झाला होता. हा सामना कोलकाताने अखेरच्या क्षणी ४ धावांनी जिंकला होता.

याच सामन्यात हैदराबादच्या मयंकला कोलकाताकडून खेळणाऱ्या हर्षित राणाने बाद केले होते. तसेच बाद केल्यानंतर त्याने त्याला फ्लाईंग किस देत सेंडऑफ दिला होता. या घटनेची बरीच चर्चा झाली होती.

हर्षितवर झाली कारवाई

दरम्यान, या घटनेनंतर हार्षितवर कारवाईही करण्यात आली होती. त्याच्यावर सामना शुल्काच्या 60 टक्के दंड ठोठावण्यात आला होता. क्रिकेटमध्ये खेळाडूंना अशाप्रकारे डिवचण्याला चूक समजले जाते. त्यामुळे अशावेळी कारवाई केली जाते.