IPL 2024: इंडियन प्रीमियर लीग 2024 स्पर्धेत मंगळवारी (16 एप्रिल) 31 व्या सामन्यात कोलकाता नाईट रायडर्सला घरच्या मैदानावर ईडन गार्डन्सवर राजस्थान रॉयल्सकडून पराभवाचा धक्का बसला. राजस्थानने या सामन्यात शेवटच्या चेंडूवर 2 विकेट्सने विजय मिळवला.

हा कोलकाताचा सहा सामन्यांतील दुसरा पराभव आहे. दरम्यान, या पराभवानंतरही कोलकाता संघाचा सहसंघमालक शाहरुख खानने संघातील खेळाडूंचे मनोबल वाढवले आहे.

या सामन्यात कोलकाताने राजस्थानसमोर 224 धावांचे आव्हान ठेवले होते. या आव्हानाचा पाठलाग राजस्थानने 8 विकेट्स गमावत शेवटच्या चेंडूवर पूर्ण केला. या सामन्यानंतर शाहरुख खान कोलकाता संघातील खेळाडूंना ड्रेसिंग रुममध्ये भेटला.

यावेळी शाहरुखने प्रेरणा देणारे भाषणही केले. तो म्हणाला, 'प्रामाणिकपणे सांगायचे झाले, तर आपण ज्याप्रकारे खेळलो, ते पाहून हा अभिमानाचा दिवस आहे. मी कोणा एकाचे नाव घेणार नाही. वाईट वाटून घेऊ नको गौतम गंभीर. आपण पुनरागमन करू.'

'रिंकू म्हणतो तसं ही ईश्वराची योजना असेल. आपण अजून चांगल्या प्रकारे आणि देवाच्या चांगल्या योजनेसह पुनरागमन करू.'

याशिवाय शाहरुख म्हणाला, 'असे काही दिवस आपल्या आयुष्यात असतात, विशेषत: खेळामध्ये, जिथे आपण पराभवासाठी पात्र नसतो आणि काही दिवस असे असतात, जिथे आपण विजयासाठी पात्र नसतो. आज आपण हरण्यासाठी पात्र नव्हतो.

शाहरुख पुढे म्हणाला, 'आपण सर्वजण खूप चांगले खेळलो. स्वत:बद्दल अभिमान वाटला पाहिजे. कृपया वाईट वाटून घेऊ नका. चेंज रुममध्ये येताना जसा आनंद वाटतो, तसाच तो वाटू द्या. आपण उच्च दर्जा राखला आहे आणि हाच दर्जा कायम करणार आहोत.'

'सर्वात महत्त्वाची गोष्टी आपल्या सर्वांमधील उर्जा आहे. मला वाटते आपण मैदानातही उर्जा दाखवली, तसेच इथेही सर्वांचे चांगले बाँडिंग आहे. त्यामुळे आपण पुढे जात राहू, सर्वांना शुभेच्छा.'

शाहरुख खानच्या या भाषणाचा व्हिडिओ कोलकाता नाईट रायडर्सने सोशल मीडियावर शेअर केला आहे. या व्हिडिओवर चाहत्यांकडूनही मोठ्या प्रमाणात कमेंट्स आल्या आहेत. अनेकांना शाहरुखने चक दे इंडिया या चित्रपटात निभावलेल्या हॉकी प्रशिक्षकाच्या भूमिकेचीही आठवण झाली आहे. (KKR Owner Shah Rukh Khan Speech)