SRH vs RR, IPL 2024: इंडियन प्रीमियर लीग 2024 स्पर्धेत (IPL) गुरुवारी (2 मे) सनरायझर्स हैदराबाद संघाने राजस्थान रॉयल्सविरुद्ध 1 धावेने रोमांचक विजय मिळवला. राजीव गांधी आंतरराष्ट्रीय स्टेडियमवर झालेला हा सामन्यात शेवटच्या चेंडूपर्यंत रोमांच पाहायला मिळाला होता.

या सामन्यात शेवटच्या चेंडूवर राजस्थानला विजयासाठी 2 धावांची गरज होती. मात्र भूवनेश्वर कुमारने गोलंदाजी केलेल्या शेवटच्या षटकातील शेवटचा चेंडू यॉर्कर टाकला, ज्यावर रोवमन पॉवेल पायचीत झाला आणि हैदराबादच्या विजयावर शिक्कामोर्तब झाला.

हैदराबादसाठी प्लेऑफच्या शर्यतीत आपले आव्हान भक्कम करण्यासाठी हा विजय महत्त्वाचा होता. त्यामुळे हा सामना शेवटच्या क्षणी अखेर खिशात घातल्यानंतर हैदराबादच्या चाहत्यांसह खेळाडूंनीही मोठा जल्लोष केला.

इतकेच नाही, तर सनरायझर्स हैदराबाद संघाची मुख्य कार्यकारी अधिकारी काव्या मारननेही आनंदाने उजी मारत जोरदार सेलीब्रेशन केले. हैदराबादच्या या रोमांचक विजयाच्या क्षणाचा व्हिडिओ आयपीएलनेही शेअर केला आहे.

या सामन्याबद्दल सांगायचे झाले, तर सनरायझर्स हैदराबादने प्रथम फलंदाजी करताना 20 षटकात 3 बाद 201 धावा केल्या होत्या. ट्रेविस हेडने 44 चेंडूत 58 धावांची खेळी केली, तर नितिश रेड्डीने 42 चेंडूत 76 धावांची खेळी केली. तसेच हेन्रिक क्लासेनने 19 चेंडूत नाबाद 42 धावांची खेळी केली. राजस्थानकडून आवेश खानने २ विकेट्स घेतल्या.

त्यानंतर राजस्थान रॉयल्सने 20 षटकात 7 बाद 200 धावा केल्या. राजस्थानकडून 49 चेंडूत 77 धावांची खेळी केली, तर यशस्वी जैस्वालने 40 चेंडूत 67 धावांची खेळी केली.

मात्र, त्यांच्या या खेळींनंतरही राजस्थानला विजयासाठी अवघी 1 धाव कमी पडली. हैदराबादकडून भुवनेश्वर कुमारने सर्वाधिक 3 विकेट्स घेतल्या, तर पॅट कमिन्स आणि टी नटराजन यांनी प्रत्येकी 2 विकेट्स घेतल्या.