Jaydev Unadkat Injury : भारताला जूनमध्ये आयसीसी वर्ल्ड टेस्ट चॅम्पियनशिपची फायनल खेळायची आहे. त्यासाठी टीम इंडियाने संघाची घोषणाही केली आहे. यादरम्यान टीम इंडिया कर्णधार रोहित शर्मा आणि कोच राहुल द्रविडची चिंता वाढली आहे. याचे कारण म्हणजे कसोटी चॅम्पियनशिपच्या अंतिम सामन्यासाठी भारतीय संघात निवड झालेल्या खेळाडूची दुखापत. डावखुरा वेगवान गोलंदाज जयदेव उनाडकट जखमी झाला आहे. टीम इंडियासाठी ही मोठी चिंतेची बाब आहे.

जयदेव उनाडकट सध्या आयपीएल खेळत आहे. लखनौ सुपर जायंट्स संघाचा उनाडकट एक भाग आहे. लखनौने त्याला सुरुवातीच्या सामन्यांमध्ये खेळायला दिले पण नंतर त्याला बेंचवर बसवले. या मोसमात त्याने तीन सामने खेळले आहेत, मात्र त्याला एकही बळी घेता आलेला नाही.

इंडियन प्रीमियर लीगने आपल्या अधिकृत इंस्टाग्रामवर उनाडकटचा एक व्हिडिओ पोस्ट केला आहे, ज्यामध्ये उनाडकटला दुखापत झाल्याचे दिसून येते. या व्हिडिओमध्ये उनाडकट गोलंदाजी करतो आणि चेंडू फेकल्यानंतर त्याच्या खांद्यावर पडतो. तो उठतो आणि खांद्याला पकडतो. उनाडकटच्या डाव्या खांद्याला दुखापत होणे ही चिंतेची बाब आहे.

वर्ल्ड टेस्ट चॅम्पियनशिपला अजून एक महिन्याहून अधिक कालावधी बाकी आहे. अशा स्थितीत उनाडकटला दुखापतीतून पुनरागमन करण्याची संधी असेल. पण त्याची दुखापत किती गंभीर आहे यावर ते अवलंबून आहे. त्याच्या दुखापतीची स्थिती काय आहे, हे अद्याप स्पष्ट झालेले नाही.

उनाडकटने 2010 मध्ये दक्षिण आफ्रिकेविरुद्ध कसोटी पदार्पण केले होते. त्यानंतर त्याला संधी मिळाली नाही. गेल्या वर्षी डिसेंबरमध्ये बांगलादेश दौऱ्यावर त्याची कसोटी संघात निवड झाली आणि 12 वर्षांनंतर तो पुनरागमन करू शकला. त्याने मीरपूरमध्ये बांगलादेशविरुद्ध कसोटी सामनाही खेळला.

उनाडकटने आतापर्यंत आपल्या कारकिर्दीत भारताकडून केवळ दोन कसोटी सामने खेळले असून तीन विकेट घेण्यात तो यशस्वी ठरला आहे. त्याचबरोबर तो भारतासाठी सात एकदिवसीय सामने खेळला आहे. त्यामध्ये त्याने आठ विकेट्स घेतल्या आहेत. उनाडकटने भारतासाठी 10 टी-20 सामने खेळले असून 14 विकेट घेण्यात तो यशस्वी ठरला आहे.