लिसेस्टर : भारताचा कसोटी संघ इंग्लंड दौऱ्यावर एकमेव कसोटी सामना खेळणार आहे. या सामन्यासाठी भारतीय संघ यापूर्वीच इंग्लंडमध्ये दाखल झाला आहे. टीम इंडिया आज लिसेस्टरशायर विरूद्ध 4 दिवसांचा सराव सामना खेळणार आहे. या सामन्यासाठी दोन्ही संघांची घोषणा झाली असून भारताने नाणेफेक जिंकून प्रथम फलंदाजी करण्याचा निर्णय घेतला. विशेष म्हणजे भारतीय संघातील काही खेळाडू भारताविरूद्धच खेळणार आहेत. (Leicestershire vs India Warm-up Match Cheteshwar Pujara Rishabh Pant Jasprit Bumrah Prasidh Krishna Play Against Team India)

लिसेस्टरशायर विरूद्ध भारत सामना आजपासून सुरू होत आहे. या चार दिवसाच्या सराव सामन्यात भारतीय संघातील वरिष्ठ खेळाडू चेतेश्वर पुजारा, ऋषभ पंत, जसप्रीत बुमराह आणि प्रसिद्ध कृष्णा हे खेळाडू लिसेस्टरशायर संघाकडून खेळणार आहेत. म्हणजेच भारतीय संघातील खेळाडूंविरूद्ध हे सर्वजण दंड थोपटणार आहेत. दुसरीकडे भारतीय संघाकडून रोहित शर्मा, श्रीकार भरत, शुभमन गिल, विराट कोहली, श्रेयस अय्यर, हनुमा विहारी, रविंद्र जडेजा, शार्दुल ठाकूर, मोहम्मद शमी, मोहम्मद सिराज, उमेश यादव खेळणार आहेत.

भारताचे काही खेळाडू लिसेस्टरशायर संघाकडून खेळण्यामागे सर्व खेळाडूंना खेळण्याची संधी मिळावी, सराव व्हावा असा उद्येश आहे. भारत आणि इंग्लंड यांच्यातील एकमेव सामना 1 जुलैपासून सुरू होणार आहे. याचबरोबर या दौऱ्यात भारत 7 जुलैपासून तीन टी 20 आणि तीन वनडे सामने देखील होणार आहेत. दरम्यान, भारताचा टी 20 संघ आयर्लंड दौरा देखील करणार आहे. या दौऱ्यात 26 जून आणि 28 जूनला भारतीय संघ दोन टी 20 सामने खेळेल.