नवी दिल्ली : भारताच्या मुरली श्रीशंकरने (Murali Sreeshankar) ग्रीसमध्ये झालेल्या 12 व्या आंतरराष्ट्रीय जंपिंग मीटमध्ये (International Jumping Meet) लांब उडी प्रकारात 8.31 मीटर लांब उडी मारत सुवर्णपदकाला गवसणी घातली. टोकियो ऑलिम्पिकमध्ये सहभाग घेतलेल्या श्रीशंकरने 8.36 मीटर लांब उडी मारत राष्ट्रीय विक्रम प्रस्थापित केला होता. दरम्यान, ग्रीसमधील स्पर्धेत स्विडनच्या टोबियास माँटलेरने 8.27 मीटर लांब उडी मारत रौप्य पदकाची कमाई केली. तर फान्सच्या जुलेस पोमेरीने कांस्य पदक पटकावले. पहिले तीन खेळाडूच 8 मीटरपेक्षा जास्त लांब उडी मारू शकले.

श्रीशंकरच्या या सुवर्ण कामगिरीनंतर भारतीय अॅथलेटिक्स महासंघाने ट्विट केले की, 'श्रीशंकरने ग्रीसमधील कालिथिया येथे झालेल्या 12 व्या आंतरराष्ट्रीय जंपिंग मीटमध्ये 8.31 मीटर लांब उडी मारली. ऑलिम्पिकनंतर पहिल्यांदाच आंतरराष्ट्रीय स्पर्धेत भाग घेणाऱ्या श्रीशंकरने सरावावेळी 7.88 आणि 7.71 मीटर लांब उडी मारली होती. केरळच्या या अॅथलिटने हंगामातील पहिल्या इंडिया ओपन जंप्स मीटमध्ये 8.14 आणि 8.17 मीटर लांब उडी मारली होती. त्याने कोझिकोडमध्ये झालेल्या फेडरेशन कपमध्ये आपलाच राष्ट्रीय विक्रम मोडला होता.'

23 वर्षाच्या मुरली श्रीशंकरने टोकियो ऑलिम्पिकमध्ये फारशी चांगली कामगिरी केली नव्हती. 7.69 मीटर बेस्ट जंपमारत तो संयुक्तरित्या 24 व्या क्रमकांकावर होता. त्याला फायनलमध्ये देखील क्वलिफाय करता आले नव्हते. टोकियो ऑलिम्पिकमध्ये ग्रीसच्या मिल्टियाडिस टेंटोग्लूने 8.41 मीटर लांब उडी मारत सुवर्ण पदक जिंकले होते.