आयपीएल १५ व्या सीझनमध्ये नव्याने पदर्पण केलेला लखनऊचा संघाला एलिमिनेटर सामन्यात आरसीबीकडून १४ धावांनी पराभव स्विकारावा लागला. या सामन्यात लखनऊच्या संघाने अनेक चुका केल्या. या चुकांवर कॅप्टन राहुल आपले मत व्यक्त करत लखनऊचं नेमकं काय चुकलं? हे सांगितलं आहे.

सामन्यानंतर राहुलने माध्यामांशी संवाद साधला. तो म्हणाला, मला वाटते आमच्या पराभवामागचे कारण अगदी स्पष्ट आहे. आम्ही मैदानावर उतरलो खरे, परंतु आम्ही क्षेत्ररक्षणात मार खाल्ला. आमच्या खेळाडूंनी सोपे झेल सोडले. कधीही सामन्यात झेल सुटल्याने मदत मिळत नाही. अशी कबुली राहुलने यावेळी दिली.

तसेच, वास्तवात बेंगलोर संघाने चांगले क्षेत्ररक्षण केले, परंतु आम्ही क्षेत्ररक्षणात कमी पडलो. रजत पाटीदारच्या शतकाने आम्हाला विजयापासून दूर नेले. जेव्हाही वरच्या ३ पैकी एखादा फलंदाज शतक करतो, तेव्हा अधिकतर संघ विजयी होतात. असे तो यावेळी म्हणाला.

आगामी सीझनमध्ये लखनऊ संघ मैदानात दमदार पुनरागमन करेल असा विश्वासही राहुलने यावेळी व्यक्त केला. आम्ही या हंगामातून खूप साऱ्या सकारात्मक गोष्टी घेऊ. ही एक नवीन फ्रँचायझी आहे. आम्ही खूप साऱ्या चूका केल्या आहेत आणि प्रत्येक संघाकडून अशा चुका होतात. पण आता आम्हाला आणखी मजबूत होऊन पुनरागमन करण्याचा प्रयत्न करायचा आहे. हा एक युवा संघ आहे, जो त्यांच्या चुकांमधूनच शिकेल. आता आम्ही घरी परत जाऊ, अजून सक्षम खेळाडू बनण्याचा प्रयत्न करू. असा प्रबळ विश्वास राहुलने यावेळी व्यक्त केला.

नाणेफेक जिंकून लखनऊ सुपर जायंटने प्रथम गोलंदाजी करण्याचा निर्णय घेतला. प्रथम फलंदाजी करताना बंगळुरूने 4 बाद 207 धावा केल्या. प्रत्युत्तरात लखनऊच्या संघाला 20 षटकांत 6 गडी गमावून 193 धावाच करता आल्या. केएल राहुलचा संघ 14 धावा दूर राहिला.