Malaysia Open 2022 : भारताची दोन वेळची ऑलिम्पिक पदकविजेत्या पी. व्ही. सिंधूला मलेशिया ऑपन सुपर 750 बॅडमिंटन स्पर्धेत उपांत्य पूर्व फेरीत पराभवाचा धक्का बसला. तैवानच्या ताई यिंगने (Tai Tzu Ying) तीन गेममध्ये सिंधूचा पराभव केला. सातव्या सिडेड सिंधूचा (PV Sindhu) दुसऱ्या सिडेड ताईने 13-21, 21-15, 21-13 तीन सेटमध्ये पराभव केला. ताईने टोकियो ऑलिम्पिकमध्ये रौप्य पदक जिंकले होते.

गेल्या काही काळापासून तैवाच्या ताईने सिंधूवर कायम वर्चस्व राखले आहे. या दोघींमध्ये आतापर्यंत 21 सामने झाले आहेत. त्यातील 16 सामने ताई यिंग आणि सिंधूने 5 सामने जिंकले आहेत. आजच्या सामन्यात पहिल्या गेममध्ये सिंधूने ताईवर 13-21 असे वर्चस्व राखले. या गेममध्ये सिंधू 2-5 ने पिछाडीवर होती. मात्र त्यानंतर तिने 11-7 अशी आघाडी घेतली.

मात्र दुसऱ्या गेममध्ये ताईने 21-15 आणि तिसरा गेम 21-13 असा जिंकत सामना खिशात टाकला. ताईने जरी दोन्ही गेम जिंकले असले तरी या गेममध्ये सिंधूने देखील कडवी टक्कर दिली होती. आता भारताच्या आशा थॉमस कप गाजवणाऱ्या एच. एस. प्रणॉयवर (SH Prannoy) टिकून आहेत. त्याचा उपांत्यपूर्व फेरीत सामना जागतिक क्रमवारीत आठव्या स्थानावर असणाऱ्या जोनाथन ख्रिस्टी याच्यासोबत आहे.