Olympics 2021 : ऑलिम्पिक स्पर्धेत पदकाची आस असलेल्या पीव्ही सिंधूने स्पर्धेतील आपला दिमाखदार विजयी सिलसिला कायम ठेवलाय. क्वार्टरफायनल सामन्यात घरच्या मैदानात खेळणाऱ्या चौथ्या मानांकित अकाने यामागुची हिला पराभूत करत तिने सेमीफायनल गाठलीये. यामागुचीने जागतिक बॅडमिंटन क्रमवारीत सहाव्या स्थानावर असलेल्या सिंधूविरुद्धच्या लढतीत आक्रमक सुरुवात केली. सुरुवातीला तिने 6-4 अशी आघाडी घेतली होती. पण यातून जोरदार कमबॅक करत सिंधूने पहिला सेट 21-13 असा जिंकला. दुसऱ्या सेटमध्ये दोघींच्यात चांगलाच संघर्ष पाहायला मिळाला. अखेर हा सेट जिंकून सिंधूने अपेक्षेप्रमाणे सेमीफायनलचे तिकीट मिळवले. ( Olympics 2021 Badminton Womens Singles Indias PV Sindhu Beat Japan Akane Yamaguchi Enter SemiFinal)

दुसऱ्या सेटमध्ये दोघींच्यात चांगलाच संघर्ष झाला. सुरुवातीला सिंधूने जपानी यामागुचीला बॅकफूटवर धाडले. त्यानंतर तिने अल्प पॉइंटची आघाडी घेतली. सिंधूने पुन्हा 18-18 अशी बरोबरी साधली. यामागुची पुन्हा 20-19 वर पोहचील. सिंधूने सामना पुन्हा 20-20 बरोबरी साधली. एवढेच नाही तिने हा सेट 22-20 असा खिशात घालत सेमीफायनलमधील प्रवेश निश्चित केला.