Covid-19 In Paris Olympics 2024 : पॅरिस ऑलिम्पिक 2024 चा थरार 26 जुलैपासून सुरू झाला आहे. पॅरिसमध्ये खेळल्या जाणाऱ्या ऑलिम्पिक खेळाचा आनंद चाहते घेत आहेत, मात्र यादरम्यान महाकुंभमध्ये कोरोनाने एन्ट्री केली आहे. इंग्लिश ऍथलीटला कोरोना पॉझिटिव्ह आढळला आहे.

ब्रिटीश जलतरणपटू ॲडम पीटी याला कोरोनाची लागण झाली आहे. ॲडमने 28 जुलै रोजी 100 मीटर ब्रेस्टस्ट्रोक स्पर्धेत पदक जिंकले होते. 100 मीटर ब्रेस्टस्ट्रोक स्पर्धेच्या अंतिम फेरीत सहभागी झालेला ॲडम पीटी हा मेडल जिंकल्यानंतर दुसऱ्याच दिवशी तो कोरोना पॉझिटिव्ह असल्याची बातमी समोर आली होती.

या स्पर्धेत निकोलो मार्टिनेंगीने सुवर्णपदक जिंकले. याशिवाय ॲडम अमेरिकन जलतरणपटू निक फिंकच्या संपर्कात आला. रविवारी (२८ जुलै) सकाळी ॲडम पीटी यांची तब्येत ठीक नव्हती. मात्र तरीही त्याने अंतिम सामन्यात भाग घेण्याचा निर्णय घेतला. अंतिम सामना खेळल्यानंतर ॲडमची प्रकृती बिघडली आणि टेस्ट केली तर तो कोरोना पॉझिटिव्ह असल्याचे आढळून आले.

पॅरिसमध्ये सुरू असलेल्या ऑलिम्पिकमध्ये कोविड-19 बाबत कोणतेही नियम नाहीत. याआधी टोकियो येथे झालेल्या ऑलिम्पिकमध्ये कोविड-19 बाबत खूप कडक अॅक्शन घेण्यात आली होती.

पॅरिस ऑलिम्पिकमध्ये कोविड-19 ची लागण झालेला ॲडम पीटी टोकियो ऑलिम्पिकचाही एक भाग होता, जिथे त्याने चमकदार कामगिरी केली. ॲडमने टोकियो ऑलिम्पिकमध्ये 3 सुवर्णपदकांसह 4 पदके जिंकली होती.

पॅरिस ऑलिम्पिकमध्ये भारताची आतापर्यंतची कामगिरी

पॅरिस ऑलिम्पिकमध्ये भारताने आतापर्यंत एक मेडल जिंकले आहे. नेमबाज मनूने महिलांच्या 10मीटर एअर पिस्तूल प्रकारातील अंतिम फेरीत तिसरं स्थान मिळवत कांस्यपदक जिंकले. या स्पर्धेत हे पदक जिंकणारी ती पहिली भारतीय महिला नेमबाज ठरली आहे. आता भारताला पुढील मेडल कधी मिळणार हे पाहणे उत्सुकतेचे ठरणार आहे.