Ravindra Jadeja T20 World Cup : भारताचा अष्टपैलू खेळाडू रविंद्र जडेजा गुडघ्याच्या दुखापतीमुळे आगामी टी 20 वर्ल्डकपला मुकणार आहे असे वृत्त एएनआयने सूत्रांच्या हवाल्याने दिले. जडेजा आशिया कपमधून दुखापतीमुळेच बाहेर गेला असून त्याच्या जागी अक्षर पटेलला संघात स्थान देण्यात आले आहे. मात्र या सर्व प्रकरणावर आता संघाचा प्रशिक्षक राहुल द्रविडने स्पष्टीकरण दिले आहे. (Rahul Dravid Statement About Injured Ravindra Jadeja)

राहुल द्रविडने पत्रकार परिषदेत सांगितले की, 'रविंद्र जडेजाच्या गुडघ्याला दुखापत झाली आहे. त्यामुळे तो आशिया कपच्या उर्वरित सामन्यांना मुकणार आहे. तो सध्या वैद्यकीय पथकाच्या देखरेखीखाली आहे. तो डॉक्टरांना भेटत आहे. तो काही तज्ज्ञ डॉक्टरांनाही भेटणार आहे.'

जडेजा टी 20 वर्ल्डकपला देखील मुकणार आहे का याबाबत बोलताना द्रविड म्हणाला, 'वर्ल्डकप अजून खूप लांब आहे. त्यामुळे तुम्ही कोणत्याही निर्णयाप्रत येऊ नका आणि त्याला वर्ल्डकपमधून बाहेर काढू नका. आपण तो दुखापतीतून कसा सावरतोय यावर नजर ठेवून आहोत.' द्रविड पुढे म्हणाला की, 'लोक दुखापतग्रस्त होत असतात हा खेळाचाच एक भाग आहे. दुखापती होण्यापासून रोखणे हा आमच्या कामाचाच भाग आहे. जडेजाच्या बाबतीत सर्व गोष्टी त्याची दुखापत किती गंभीर आहे आणि तो त्यातून कसा सावरतो यावर अवलंबून आहेत.

द्रविड रविंद्र जडेजा वर्ल्डकपमधून बाहेर जाईल असे मानण्यास तायर नाही. तो म्हणतो की, 'मी जडेजा वर्ल्डकपमधून बाहेर झाला असं मानत नाही. जोपर्यंत जडेजाच्या दुखापतीचे चित्र स्पष्ट होत नाही तोपर्यंत मी यावर जास्त काही बोलू इच्छित नाही. टी 20 वर्ल्डकपला अजून 6 ते 7 आठवडे अवकाश आहे.'