Ramiz Raja Pakistan Asia Cup 2023 : पाकिस्तानने पुन्हा एकदा आशिया कप 2023 बाबत आपला राग व्यक्त केला आहे. आशिया चषक पाकिस्तानच्या बाहेर हलवल्यास त्यांचा संघ या स्पर्धेत सहभागी होणार नाही, अशी धमकी पाकिस्तान क्रिकेट बोर्डाने दिली आहे. यापूर्वी पीसीबीने वनडे वर्ल्ड कपमधून माघार घेण्याची धमकी दिली होती. मीडिया रिपोर्ट्सवर विश्वास ठेवला तर आशिया कप 2023 पाकिस्तानच्या बाहेर हलवला जाऊ शकतो. त्यामुळेच पीसीबीकडून वारंवार संतापजनक वक्तव्ये येत आहेत.

क्रिकइन्फोच्या बातमीनुसार, रमीझने पाकिस्तान-इंग्लंड कसोटी सामन्याच्या पार्श्‍वभूमीवर सांगितले की, 'जर भारतीय संघ पाकिस्तानमध्ये आला नाही तर आम्हीही तिथे जाणार नाही. जर आशिया चषकाचे यजमानपद पाकिस्तानकडून हिसकावले गेले तर आम्ही ते सोडण्याचा विचार करू.' रमीझने यापूर्वी वनडे विश्वचषकातून माघार घेण्याची धमकी दिली होती.

मीडियामध्ये सुरू असलेल्या बातम्यांनुसार, आशिया कप 2023 चे यजमानपद पाकिस्तानकडून हिसकावले जाऊ शकते. ही स्पर्धा पाकिस्तानबाहेर आयोजित करण्याचा विचार सुरू आहे. मात्र याबाबत कोणतेही अधिकृत वक्तव्य समोर आलेले नाही.

राजकीय तणावामुळे 2012 नंतर भारत आणि पाकिस्तान यांच्यात कोणतीही द्विपक्षीय मालिका खेळली गेली नाही. त्याचबरोबर टीम इंडियाला पाकिस्तानमध्ये जाऊन जवळपास 14 वर्षे झाली आहेत. 2008 मध्ये भारतीय संघ शेवटच्या वेळी पाकिस्तानला गेला होता. त्यामुळे दोन्ही देशांच्या क्रिकेट बोर्डांमध्ये तणावाचे वातावरण आहे. याबाबत रमीझ राजा म्हणाले की, आमची भूमिका स्पष्ट आहे. जर टीम इंडिया पाकिस्तानात आले तरच आम्ही विश्वचषक खेळायला जाऊ. तसे झाले नाही तर विश्वचषक पाकिस्तानशिवाय खेळावा लागेल.