Ravindra Jadeja : रविंद्र जडेजाने इडन गार्डनवर दमदार कामगिरी केली. त्याने दक्षिण अफ्रिकेविरूद्धच्या सामन्यात 33 धावात पाच विकेट्स घेत भारताच्या विजयात मोलाचा वाटा उचलला. फिरकीपटूंना पोषक खेळपट्टीवर दक्षिण अफ्रिकेच्या गोलंदाजांपेक्षा रविंद्र जडेजा सरस ठरला.

भारताने प्रथम फलंदाजी करत 327 धावा केल्या होत्या. त्यानंतर दक्षिण अफ्रिकेचा 83 धावात खुर्दा उडवला. भारताने सामना 243 धावांनी जिंकत गुणतालिकेतील आपले अव्वल स्थान पक्के केले.

रविंद्र जडेजाने यंदाच्या वर्ल्डकपमध्ये आतापर्यंत 14 विकेट्स आणि महत्वाच्या क्षणी फलंदाजी करत 110 धावा केल्या आहेत. जडेजा हा युवराज सिंगनंतर वर्ल्डकपमध्ये 5 विकेट्स घेणारा भारताचा दुसरा फिरकीपटू ठरला आहे.

दरम्यान, सामन्यानंतर रविंद्र जडेजाने भन्नाट प्रतिक्रिया दिली. तो म्हणाला, 'पहिल्या दिवसापासूनच मी कर्णधारासारखा विचार करतोय मात्र मी कर्णधार नाही ही दुसरी गोष्ट. एक अष्टपैलू खेळाडू म्हणून 30 - 35 धावा करणे आणि भागीदारी तोडणे ही माझी जबाबदारी आहे. मी कायम प्रभावी कामगिरी करण्याचा प्रयत्न करतो.'

'मी फिल्डिंग करताना सर्व गोष्टी गृहीत धरत नाही. मी झेल देखील सोडू शकतो. मी देखील झेल सोडू शकतो त्यामुळे मी कायम सतर्क राहण्याचा प्रयत्न करत असतो. मी जरी झेल घेतला तरी मी निवांत होत नाही. मी कायम प्रयत्नशील राहतो. मी कधी यशस्वी होईन कधी नाही. मात्र मी कायम प्रयत्न करत राहतो.'

रविंद्र जडेजाच्या मते त्याच्या दृष्टीने ऑस्ट्रेलिया आणि दक्षिण अफ्रिकेविरूद्ध महत्वाच्या विकेट्स घेणे आणि न्यूझीलंडविरूद्धच्या सामन्यात कठिण परिस्थितीत धावा करणे हे खूप महत्वाचे आहे. तो म्हणाला, 'गेल्या काही सामन्यात माझा रिदम चांगला आहे. मी आनंदी आहे की मी संघासाठी आपले योगदान देऊ शकलो. मी फलंदाजी आणि गोलंदाजीत चांगली कामगिरी करतोय. येणाऱ्या सामन्यात देखील मी चांगली कामगिरी करणार असा विश्वास मला आहे.'

(Sports Latest News)