मुंबई: विराट कोहली (Virat Kohli) याने शनिवारी भारतीय क्रिकेट संघाच्या नेतृत्वपदावरून माघार घेण्याचा निर्णय घेतला. त्याने अचानक घेतलेल्या या निर्णयानंतर चोहोबाजूंनी यावर प्रतिक्रिया उमटल्या. विराट कोहलीच्या नेतृत्वात टीम इंडियाने कौतुकास्पद कामगिरी केली, अशा शब्दांत काहींनी त्याचे कौतुक केले, तर काहींनी दक्षिण आफ्रिकेतील पराभवानंतर तो नेतृत्व सोडेल हे अपेक्षित होते, असे म्हटले. याप्रसंगी भारताचे माजी क्रिकेटपटू संजय मांजरेकर (Sanjay Manjrekar) यांनी स्पष्ट मत व्यक्त करताना म्हटले की, विराट कोहलीच्या डोक्यावर नेतृत्व जाण्याची टांगती तलवार असते तेव्हा तो नेतृत्व सोडून देतो. याआधी त्याने टी-२०, वन डे क्रिकेट संघ, आयपीएल संघाच्या नेतृत्व पदाचा तडकाफडकी राजीनामा दिला होता, असेही त्यांनी म्हटले आहे. Sanjay Manjrekar statement about Virat Kohli leaving Test Captaincy)

प्रशिक्षक राहुल द्रविड व रवी शास्त्री यांच्यामध्ये फरक आहे. फलंदाजीतही विराटकडून धावा होत नाही आहेत, असेही त्यांनी सांगितले.

आश्‍चर्य वाटले नाही : सुनील गावसकर

विराट कोहलीच्या निर्णयाबाबत आपले मत व्यक्त करताना भारताचे महान फलंदाज सुनील गावसकर म्हणाले, विराटच्या निर्णयाचे मला आश्‍चर्य वाटले नाही. मालिकेनंतर बक्षीस वितरण सोहळ्यात तो कसोटी क्रिकेटचे नेतृत्व सोडेल असे वाटले होते. पण दक्षिण आफ्रिकेतील मालिका पराभवाचा राग त्याच्या मनामध्ये असावा. यामुळे निर्णयासाठी विलंब केला, असे पुढे ते म्हणाले.

बीसीसीआयसह सहकाऱ्यांच्या प्रतिक्रिया

विराट कोहलीने कसोटीचे नेतृत्व सोडल्यानंतर बीसीसीआयसह टीम इंडियाच्या आजी-माजी सहकाऱ्यांनी आपल्या भावना व्यक्त केल्या आहेत. बीसीसीआयचे अध्यक्ष सौरव गांगुली म्हणाले, विराट कोहलीच्या नेतृत्वात भारताने तिन्ही प्रकारांत प्रगती केली आहे. त्याने घेतलेला निर्णय हा वैयक्तिक आहे. त्याचा आम्ही आदर करतो. पण यापुढेही तो संघाचा सदस्य असेल.