Sanju Samson Captain Of India A : भारताचा विकेटकिपर आणि आक्रमक फलंदाज संजू सॅमसनला टी 20 वर्ल्डकप संघात स्थान मिळाले नाही. संजूला डावलल्याने त्याचे चाहते नाराज झाले होते. त्यांनी सोशल मीडियावर आपला रोष देखील व्यक्त केला होता. आता मात्र संजू सॅमसनच्या चाहत्यांना थोडाफार का असेना दिलासा मिळाला आहे. संजू सॅमसनला न्यूझीलंड अ संघाविरूद्ध मायदेशात होणाऱ्या वनडे मालिकेसाठी भारतीय अ संघाचा कर्णधार करण्यात आले आहे.

न्यूझीलंड अ विरूद्ध होणारी ही वनडे मालिका सप्टेंबर 22 पासून सुरू होणार आहे. ही मालिका चेन्नईमध्ये होणार असून या मालिकेतील पुढील दोन सामने हे 25 आणि 27 सप्टेंबरला होणार आहेत. या मालिकेत पृथ्वी शॉ, अभिमन्यू इश्वरन, ऋतुराज गायकवाड, शार्दुल ठाकूर आणि उमरान मलिक हे स्टार खेळाडू देखील खेळणार आहे.

याच आठवड्यात टी 20 वर्ल्डकपसाठीच्या भारतीय संघाची घोषणा झाली होती. संजू सॅमसनला भारतीय संघात स्थान मिळाले नव्हते. विशेष म्हणजे निवडसमितीने त्याला स्टँड बायमध्येही जागा दिली नाही. त्यानंतर सोशल मीडियावर त्याच्या नावाचा ट्रेंड सुरू झाला होता. त्याचे चाहते त्याला डावलल्याबद्दल खूप नाराज होते. आता संजूला भारतीय अ संघाचे कर्णधारपद दिल्याने त्याच्या चाहत्यांची नाराजी थोडीफार दूर होऊ शकते.

भारतीय अ संघ :

पृथ्वी शॉ, अभिमन्यू इश्वरन, ऋतुराज गायकवाड, राहुल त्रिपाठी, रजत पाटीदार, संजू सॅमसन (कर्णधार), केएस भरत (विकेट किपर), कुलदीप यादव, शाहबाज अहमद, राहुल चाहर, तिलक वर्मा, कुलदीप सने, शार्दुल ठाकूर, उमरान मलिक, नवदीप सैनी, राज अंगद बवा