नवी दिल्ली : भारतीय क्रिकेट संघाचा माजी कर्णधार विराट कोहलीसाठी (Virat Kohli) यंदाचा आयपीएल हंगाम (IPL 2022 फारसा चांगला गेलेला नाही. यंदाच्या हंगामात विराटच्या बॅटमधून त्याच्या लौकिकास साजेशा धावा निघाल्या नाहीत. त्यामुळे सोशल मीडियावर विराटबद्दल अनेक लोकं टीका करत आहे.

दरम्यान, या टीका करणाऱ्यांना फैलावर घेत पाकिस्तानचा माजी वेगवान गोलंदाज शोएब अख्तर (Shoaib Akhtar) विराट कोहलीच्या समर्थनात पुढे आला आहे.

अख्तरने स्पोट्स कीडाला दिलेल्या मुलाखतीत सांगितले की, 'लोकांना वक्तव्य करण्यापूर्वी जरा विचार करण्याची गरज आहे. छोटी मुले त्यांच्याकडे बघत आहेत. विराट कोहलीबाबत त्यांनी विचारपूर्वक बोलले पाहिजे. विराट कोहलीला सन्मान मिळालाच पाहिजे. तो त्याचा हक्क आहे.'

शोएब अख्तर पुढे म्हणाला की, 'मी पाकिस्तानी होण्याच्या नात्याने सांगतो की विराट कोहली ऑल टाईम ग्रेट खेळाडू आहे. मला वाटते की त्याने आंतरराष्ट्रीय क्रिकेटमध्ये 110 शतके ठोकावीत आणि 45 वर्षापर्यंत क्रिकेट खेळत रहावे.'

अख्तर इथेच थांहला नाही तर तो म्हणाला की, 'विराटवर टीका करणाऱ्यांनी आपल्या शब्द सांभाळून वापरले पाहिजेत. त्यांना सचिन तेंडुलकरकडून शिकले पाहिजे. तो किती नम्र व्यक्ती आहे. तो कोणतेही वक्तव्य देताना विचार करतो. विराटवर टीका करणारे लोक काहीही बोलतात. कधी त्याच्या पत्नीबद्दल तर कधी त्याच्या मुलीबद्दल काहीही बोलतात. हे सर्व ठीक नाही.'