Shoaib Akhtar : टी 20 वर्ल्डकप 2022 ची फायलन इंग्लंड आणि पाकिस्तान यांच्यात होत आहे. पावसाच्या सावटाखाली का असेना नाणेफेक होऊन सामन्याला सुरूवात झाली आहे. इंग्लंडने भारतासारख्या बलाढ्य संघाचा 10 विकेट्सनी मोठा पराभव केला. यामुळे अंतिम सामन्यात पाकिस्तानसमोर इंग्लंडचे तगडे आव्हान असणार आहे. दरम्यान, याबाबतच पाकिस्तानचा माजी वेगवान गोलंदाज शोएब अख्तरने वक्तव्य करत पुन्हा एकदा भारताला चिमटा काढला.

टीम इंडिया सेमी फायनलमध्ये इंग्लंडकडून पराभूत झाल्यानंतर शोएब अख्तर भारतावर सातत्याने टीका करत आहे. आता इंग्लंड पाकिस्तान अंतिम सामन्यादरम्यान देखील अख्तरने भारताला टोमणा मारला. आपल्या युट्यूब चॅनलवरील व्हिडिओत अख्तर म्हणाला की, 'सेमी फायनल आणि फायनल सामन्यात फरक इताकच असणार आहे की इंग्लंडचा आत्मविश्वास हा आभाळात पोहचला असेल. मात्र इंग्लंडला माहिती आहे की पाकिस्तानचे गोलंदाज भारतासारखे नाहीत. त्यांना विजय मिळवण्यासाठी खूप कष्ट करावे लागणार आहेत. त्यांना जाता जाता विजय मिळवता येणार नाहीये.'

अंतिम सामन्यात पाकिस्तानच्या विजयाची किती शक्यता आहे याबाबत बोलताना अख्तर म्हणाला की, 'संघाचा विजय हा बाबर आझम आणि मोहम्मद रिझवान यांच्यावर बराचसा अवलंबून असणार आहे. न्यूझीलंडविरूद्धच्या सामन्यात या दोघांचा स्ट्राईक रेट खूप महत्वाचा ठरला होता. मेलबर्नवरील विकेट या दोघांना तोच स्ट्राईक रेट कायम राखण्यास मदत करेल.'

पाकिस्तान इंग्लंड फायनल सामन्यात जॉस बटलर आणि अॅलेक्स हेल्स या विस्फोटक जोडीकडूनही अपेक्षा असणार आहेत. सेमी फायनलमध्ये बटलरने नाबाद 80 तर हेक्सने नाबाद 86 धावांची दमदार खेळी केली होती. अंतिम सामन्यात देखील ही जोडी अशीच कामगिरी करेल अशी अपेक्षा आहे.