Team India Asia Cup 2022 : आशिया कप 2022 च्या सुपर फोर मध्ये भारतीय संघाला सलग दुसऱ्या पराभवाला सामोरे जावे लागले आहे. दुबई आंतरराष्ट्रीय क्रिकेट स्टेडियमवर मंगळवारी झालेल्या सामन्यात श्रीलंकेने भारताचा सहा गडी राखून पराभव केला. भारताने श्रीलंकेला 174 धावांचे लक्ष्य दिले होते, जे त्यांनी एक चेंडू शिल्लक असताना पूर्ण केले. या पराभवामुळे भारतीय संघ आशिया चषक स्पर्धेतून जवळपास बाहेर पडला आहे. पण टीम इंडियाला फायनलच्या शर्यतीत राहण्याची एक संधी तरी आहे का?

अंतिम फेरीत पोहोचण्यासाठी टीम इंडियाला अफगाणिस्तानविरुद्धचा शेवटचा सामना मोठ्या फरकाने जिंकावा लागेल. एवढेच नाही तर त्यांच्या विजयाबरोबरच भारतीय संघाला इतर संघही आपला सामना गमावावा अशी प्रार्थना करावी लागेल. आज अफगाणिस्तानने पाकिस्तानला पराभूत केले तर भारतीय संघ स्पर्धेत कायम राहील. पाकिस्तानने विजय मिळवला तर भारत स्पर्धेबाहेर जाईल. आता अशा परिस्थितीत आजच्या सामन्यावर बरेच काही अवलंबून आहे.

पाकिस्तानी संघ अफगाणिस्तानकडून हरला तरी टीम इंडियाला पुन्हा दुसऱ्या सामन्याची वाट पाहावी लागणार आहे. हा सामना पाकिस्तान आणि श्रीलंका यांच्यात होणार आहे. जर श्रीलंकेने हा सामना जिंकला तर ते सलग 3 विजयांसह अंतिम फेरीत पोहोचतील. त्यानंतर अफगाणिस्तान, पाकिस्तान आणि भारत 1-1 जिंकतील. त्यानंतर अंतिम फेरीत पोहोचणारा संघ निव्वळ धावगतीच्या आधारावर ठरवला जाईल. भारताला फायनल खेळायची असेल तर पाकिस्तानला हरणे आवश्यक आहे.

नाणेफेक हारल्यानंतर प्रथम फलंदाजी करताना भारताने 20 षटकांत 8 विकेट गमावून 173 धावा केल्या. रोहित शर्माने 72 धावांची खेळी केली. प्रत्युत्तरात श्रीलंकेने 19.5 षटकांत चार गड्यांच्या मोबदल्यात लक्ष्य गाठले.