UEFA Euro 2020 Spain vs Sweden : युरो चषकातील दहाव्या सामन्यात स्विडनने दोन वेळच्या चॅम्पियन स्पेनला रोखून दाखवले. घरच्या मैदानात खेळणाऱ्या स्पेनने पहिल्या हाफपासून आक्रमक खेळ केला. स्वीडनची बचाव फळी आणि जिमनॅस्टिकचा छंद जोपसणारा स्विडनचा गोलकिपर रॉबिन ओल्शे यांनी सर्वोत्तम कामगिरी करत मोक्याच्या क्षणी अप्रतिम भूमिका बजावली. त्यांनी जबरदस्त खेळ करत स्पेनला गोल करण्यापासून रोखले. परिणामी आतापर्यंत झालेल्या सामन्यातील पहिला सामना गोलविरहित ड्रॉ राहिला. (UEFA Euro 2020 Spain vs Sweden play to 0-0 draw)

युरोच्या इतिहासात सर्वाधिक पास करण्याचा विक्रम (700+) आणि 70+ टक्के पेक्षा अधिक काळ चेंडू आपल्याकडे ठेवूनही स्पेनला गोल करता आला नाही. स्पेनला गोलशून्य बरोबरीत रोखून स्वीडनने मिळवलेला गुण हा त्यांच्यासाठी खूप महत्त्वपूर्ण असाच आहे. याशिवाय स्वीडनच्या कमालीच्या खेळीने ग्रुप ईमध्ये स्लोवाकियाला मोठा फायदा झालाय.

स्पेन आणि स्वीडन यांच्यातील सामन्यानंतर स्पेन गुणतालिकेत टॉपला असेल, असा अंदाज बांधण्यात आला होता. पण या सामन्यात स्पेनला एकही गोल न करता आल्याने पोलंडला 2-1 अशा फरकाने पराभूत करणाऱ्या स्वोकियाने गुणतालिकेत अव्वलस्थानी आहे. स्पेन, स्वीडन प्रत्येकी एका गुणासह दुसऱ्या आणि तिसऱ्या स्थानी असून पोलंड तळाला आहे.

या लढतीत स्पेनने पहिल्या हाफमध्ये अनेक संधी दवडल्या. 17 शॉटमध्ये त्यांनी केवल 5 शॉट हे ऑन टार्गेट लागले. दुसरीकडे स्वीडन 4 पैकी एक शॉट्स ऑन टार्गेट होता. जे दोन्ही संघाच्या गोलीने सुरक्षितपणे अडवले. लढतीमध्ये स्पेनने 86 टक्के पजेशन (चेंडूवरील नियंत्रण) आपल्याकडे ठेवले. तर केवळ 14 पजेशन राखण्यात स्वीडनला यश आले. सामन्यावर वर्चस्व राखूनही स्पेनला गोल करता आला नाही. स्वीडनच्या पास पेक्षा स्पेनची पासिंग ही सर्वोत्तम दिसली. स्पेनने सामन्यादरम्यान 6 कोर्नर घेतले. पण सामना गोलशून्य बरोबरीत राहिला.