Rohit Sharma: अफगाणिस्तान संघाविरुद्ध दणकट खेळ करून मोठा विजय संपादल्यावर भारतीय संघातील खेळाडूंच्या चेहऱ्‍यावर समाधान होते. चांगल्या खेळाबरोबर नेट रन रेट उंचावल्याचे समाधान जास्त होते.

एकाच शतकी खेळीत एकापेक्षा जास्त विक्रम करणारा कप्तान रोहित शर्मा सामन्यानंतर बोलताना शांत होता. विक्रमांचा आनंद आहे. एक नक्की आहे की, माझ्या डोक्यात विचार फक्त विश्वचषक मोहिमेचा आहे, विक्रमांचा नाही, रोहितने एकाच वाक्यात स्पष्ट केले.

अफगाणिस्तानच्या फलंदाजांनी मन लावून खेळी केल्याने आम्हाला चांगले आव्हान पेलावे लागले होते. अर्थात अरुण जेटली मैदानाची खेळपट्टी फलंदाजीला खरंच उत्तम होती. फलंदाजी चालू केल्यावर ध्यानात आले की, चेंडू बॅटवर छान येतोय. मग क्षेत्ररचनेच्या नियमांच्या मर्यादा लक्षात घेऊन थोडासा धोका पत्करून काही फटके मुद्दाम मारले.

गोलंदाजांवरचे दडपण वाढवण्यात यश आल्यावर पुढच्या गोष्टी शक्य झाल्या. मला चांगली फलंदाजी जमायला लागली की मी अर्धवट खेळी करणे टाळतो. संघाची गरज लक्षात घेऊन दीर्घकाळ खेळायचा प्रयत्न करतो. संपूर्ण सामन्यात भारतीय संघाने चांगले वर्चस्व गाजवत खेळ केला याचे समाधान आहे, असे रोहित शर्मा म्हणाला.

आईची भेट होईल : बुमरा
चार फलंदाजांना बाद करणारा जसप्रीत बुमरा नेहमीप्रमाणे अगदीच शांत होता. मी यश-अपयशाने फार आनंदी किंवा दु:खी होत नाही. माझे लक्ष माझ्या तयारीवर असते. तीन सत्रांत मला गोलंदाजी करून योग्य परिणाम साधता आला याचे बरे वाटले. आता पुढचा सामना मी माझ्या घरच्या मैदानावर, म्हणजेच अहमदाबादला खेळणार आहे.

माझ्या आईला भेटणार आहे आणि नरेंद्र मोदी स्टेडियमवर मी कसोटी सामना खेळलोय, पण एकदिवसीय सामना पहिल्यांदाच खेळणार असल्याने वेगळीच मजा येणार आहे, बुमराने मंद स्मित करत पत्रकारांना सांगितले.