काकामिगारा : सुनेलिता तोप्पो हिने केलेल्या एकमेव आणि निर्णायक गोलाने भारताची दोन उद्दिष्ट्ये पार झाली. एक तर ज्युनियर महिला आशिया कप स्पर्धेच्या अंतिम फेरीत स्थान मिळवले, त्याचबरोबर ज्युनियर महिलांच्या विश्वकरंडक स्पर्धेसाठीही पात्रता मिळवली. सुनेलिताच्या गोलाने भारताने उपांत्य सामन्यात जपानचा १-० असा पराभव केला.

ज्युनियर गटाची विश्वकरंडक स्पर्धा सँतियागो येथे २९ नोव्हेंबर ते १० डिसेंबर या कालावधीत होत आहे. या आशिया कप स्पर्धेत पहिले तीन क्रमांक मिळवणारे देश ज्युनियर विश्वकरंडक स्पर्धेसाठी थेट पात्र ठरणार आहेत.

ज्युनियर आशिया कप स्पर्धेत भारताने २०१२ नंतर दुसऱ्यांदा अंतिम फेरी गाठली आहे. यजमान जपानविरुद्धच्या सामन्यात पहिल्या तीन सत्रांत एकही गोल झाला नव्हता. बरोबरीची ही कोंडी सुनेलिताने ४७ व्या मिनिटाला फोडली. तिने केलेला गोल सामन्यातला एकमेव आणि निर्णायक गोल ठरला. आता उद्या रविवारी होणाऱ्या अंतिम सामन्यात भारताचा विजेतेपदाचा मुकाबला कोरियाविरुद्ध होईल.

भारत आणि जपान यांच्यातील हा सामना कमालीचा चुरशीचा झाला. दोन्ही संघांतील खेळाडू एकमेकांना एक इंचही देत नव्हते इतका संघर्ष झाला. सुनेलिताला मात्र थोडीशी संधी मिळाली आणि त्याचे तिने सोने केले. सामन्यात जोरदार संघर्ष झाला तरी गोल करण्याच्या तेवढ्याच संधीही मिळाल्या होत्या. दोघांनाही प्रत्येकी १२ पेनल्टी कॉर्नर मिळाले; परंतु त्यावर एकही गोल झाला नाही.

या स्पर्धेत प्रभावी खेळ करत असलेल्या भारताने सुरुवात जोरदार आक्रमक खेळाने केली. चेंडूचा ताबा आपल्याकडेच राखत गोल करण्याच्या काही संधी मिळवल्या होत्या. त्यानंतर संधी मिळताच जपानेही भारतीय गोलक्षेत्रात आक्रमण केले होते. आक्रमण-प्रतिआक्रमणाचा हा खेळ इतका जोरदार होत होता की दोन्ही संघांत डावे-उजवे करणे कठीण होते.