दागिने हा महिलांचाच नाही तर पुरूषांचाही अत्यंत जिव्हाळ्याचा विषय बनला आहे. दागिने मोत्याचे, पोवळ्याचे, हिऱ्याचे असे अनेक प्रकारचे आहेत. या सगळ्यात सोन्याचे दागिने अधिक लोकप्रिय आहेत. सोन्याचा घसघशीत हार, नाजूक माळ, मोत्यांचा पेशवेशाही दागिना, आधुनिक प्रकारचा हार दागिना कोणताही असो त्याची योग्य देखभाल व्हायला हवी.

सर्वसाधारणपणे सोन्याचे दागिने जास्त वापरले जातात. सध्या लग्नसराई सुरूय तर त्यामूळे नवरीमुलीला भरमसाठ सोने दिले जाते. त्यामुळे त्यांची काळजी कशी घ्यायची हे माहीत नसते. त्यामूळे ते तूटतात, खराब होतात. किंवा त्यावरील डिझाईन तूटते. अशावेळी नूकसानच जास्त होते. त्यामूळेच सोन्याच्या दागिन्यांची काळजी कशी घ्यायची हे पाहुयात.

- दागिने काळे पडले असल्यास ते कोमट पाण्यात दागिने १५ मिनिटे बुडवून ठेवा. त्यामुळे त्यात साचलेले धुलीकण निघून जातील.

- कोमट किंवा साध्या पाण्यात, सोडा वॉटरमध्ये थोडे लिक्विड डिटर्जंटचे काही थेंब टाकून त्यात थोडा वेळ दागिने भिजत घाला. नंतर हळूहळू ब्रशने साफ करा.

- दागिने साफ करताना लहान मुले दात घासण्यासाठी वापरतात तसा छोटा सॉफ्ट ब्रश वापरा.

- दागिन्यांमध्ये मौल्यवान खडे असतील तर जास्त गरम पाणी किंवा उकळत्या पाण्याचा अजिबात वापर करु नका. पाण्याच्या उच्च तापमानामुळे दागिन्याला तडे जाण्याची शक्यता असते.

- दागिने वापरून झाले की कापसाच्या बोळ्याने किंवा कपड्याने ते पुसून घ्या आणि कोरडे करून झाल्यानंतरच ते बॉक्समध्ये भरून ठेवा.

- अनेकदा आपण अंगावर दागिने घालूनच आंघोळीला जातो किंवा धुणी भांडी करत असतो. या क्रियेत दागिने हे साबण किंवा शॅम्पूच्या संपर्कात येतात, यामुळे तुमच्या सोन्यावर असलेली झळाळी कमी होऊ शकते.

- सोन्याचे दागिने इतर कोणत्याही दागिन्यांसोबत ठेवू नका. शक्यतो प्रत्येक दागिन्यांसाठी वेगळा बॉक्स ठेवा. मोत्याचे, चांदीचे आणि इतर खोट्या दागिन्यांच्या संपर्कात सोन्याचे दागिने आल्यास ते काळे पडतात.