Mothers Day 2024 :

जगभरात प्रत्येक नात्यावर प्रेम व्यक्त करणारा एक खास दिवस असतो. आईवर आपण सगळ्यात जास्त प्रेम करतो. कारण, आईबद्दल आपल्या मनात हळवा कप्पा असतो. वर्षातले सगळे दिवस आईचेच असतात तरीही आईसाठी एक स्पेशल दिवस असतो. तो म्हणजे मदर्स डे.   

मदर्स डे (Mothers day 2024 ) दरवर्षी मे महिन्याच्या दुसऱ्या रविवारी साजरा केला जातो. यावेळी 12 मे रोजी साजरा केला जाईल. हा दिवस मातांचे प्रेम, समर्पण, त्याग आणि समर्थनासाठी आभार मानण्याचा दिवस आहे. मदर्स डे साजरा करण्याची सुरुवात अमेरिकेच्या एना एम. जोविस यांनी केली. जगातील वेगवेगळ्या देशांमध्ये हा दिवस वेगवेगळ्या दिवशी साजरा केला जातो.

अनेक देशांमध्ये हा दिवस सुट्टीचाही असतो. युरोप आणि ब्रिटनमध्ये, अगदी एका रविवारी आईचा सन्मान करण्याची परंपरा आहे, ज्याला मदरिंग संडे म्हणतात. भारतातही हा ट्रेंड वाढला आहे. (Mothers Day 2024 )

सगळ्यांच सगळं करणारी आई आपण तिच्यासाठी काही वेगळं करूयात असं तुम्हाला नक्कीच वाटत असेल. तर आज आम्ही तुम्हाला काही स्पेशल गोष्टी सांगणार आहोत. ज्यामुळे तुमचा आणि आईचा दिवस स्पेशल होईल.

आईला सुट्टी द्या

आईचा हा दिवस स्पेशल बनवण्यासाठी तिला एक दिवस सुट्टीवर पाठवा. आई सतत कामात असते. तिला स्वत:साठी वेळ मिळत नाही. तिला तिच्या हक्काचा दिवस मिळावा यासाठी तिच्या मैत्रिणींसोबत किंवा तिच्यासाठी सोलो ट्रिप प्लॅन करा.

आईसाठी मुव्ही प्लॅन करा

आजकाल अनेक वेबसिरीज, चित्रपट मालिकांमधून आईबद्दलचे महत्त्व सांगितले जाते. पण स्वत: ती तो चित्रपट कितीवेळा पाहते याचा विचार तुम्ही केलाय का? आजकालची आई व्हॉट्सअप चालवणारी आहे असे म्हटले जाते. पण मुलांची घराची जबाबदारी तिला मोकळेपणाने एक चित्रपट पहायला देत नाही. कारण, ती एकटी कधी जात नाही. त्यामुळे मदर्स डे दिवशी आईसाठी मुव्हीची तिकीटे काढून आणा.

आईसाठी डिनर प्लॅन करा

तुम्हाला घरातील प्रत्येकाला आवडतील ते पदार्थ बनवून घालणाऱ्या आईला काय आवडतं याचा तुम्ही विचार केलाय का? फार कमी लोक आहेत ज्यांना आपल्या आईला काय आवडत हे माहितीय. कारण, इतरवेळी तुम्ही घरातून बाहेर खायला गेला की तुम्ही घेऊन याल ते ती गपचूप खाते.

त्यामुळेच आईसाठी एक डिनर प्लान करा. तुमच्यासोबत एखाद्या हॉटेलमध्ये जाणं तिला आवडणार नाही, ती म्हणेल की उगीच कशाला खर्च करतोय, तरी तुम्ही ऐकू नका. तिला हक्काने जेवायला घाला. ती मनातून सुखावेल.

आईला भेटवस्तू द्या

आई सगळ्यांसाठी सगळं करते. घरी कोणी पहिल्यांदा आलं तर त्यांचा मानपान करते. पण आईला कोणी असं करत का हो? तुमची आई बऱ्याच दिवसांपासून एखादी साडी, एखादी वस्तू जी तिच्या कामाची असेल ती मागत असते. मात्र खर्च जास्त होईल म्हणून ती घेत नाही. अशावेळी तुम्हाला माहिती असलेली एखादी तिच्या उपयोगाची वस्तू तिला घेऊन द्या.