भोपाळ : मतदानाची तारीख जवळ येत असताना राजकीय प्रचारमोहिमांना वेग आला आहे. मध्य प्रदेशमध्ये प्रमुख उमेदवारांमध्ये केंद्रीय मंत्री ज्योतिरादित्य शिंदे आणि माजी मुख्यमंत्री कमलनाथ यांचे पुत्र नकुलनाथ यांचा समावेश होतो.

हे दोघे आपापल्या पक्षाचेही प्रमुख नेते असल्याने इतर मतदारसंघांमध्येही त्यांना प्रचारासाठी जावे लागत आहे. अशावेळी या दोघांच्या अर्धांगिनींनी प्रचारात उडी घेतली आहे. राजघराण्यातील ज्योतिरादित्य शिंदे यांच्या पत्नी प्रियदर्शनी राजे शिंदे आणि श्रीमंत उमेदवारांपैकी एक असलेले नकुलनाथ यांच्या पत्नी प्रिया नाथ या दोघींनी आपापल्या पतींची प्रचाराची धुरा आपल्या खांद्यावर घेतली आहे.

रणरणत्या उन्हात त्या प्रचारफेऱ्या काढत घरोघरी जाऊन प्रचार करत आहेत. मतदारांना जाऊन भेटणे, भजन गाणे, छोट्या दुकानदारांच्या भेटी-गाठी घेणे यासाठी त्या वेळ तर देतच आहेत, शिवाय शेतामध्ये उतरून शेतकऱ्यांच्या कामातही त्यांना हातभार लावत आहेत.

छिंदवाडाचे खासदार असलेले नकुलनाथ पुन्हा याच मतदारसंघातून रिंगणात उतरले आहेत. माझ्या पतीला मतदारांनी साथ द्यावी, अशी विनंती करत प्रिया नाथ या सामान्य नागरिकांच्या भेटी घेत आहेत. काही दिवसांपूर्वीच नवेगाव या ग्रामीण भागात जाऊन त्यांनी ग्रामस्थ महिलांबरोबर पारंपरिक नृत्य केले, शेतात उतरून कापणी केली.

प्रियदर्शनी या बडोद्याच्या राजघराण्यातील आहेत. त्यांनीही पती ज्योतिरादित्य शिंदे यांच्या प्रचारासाठी पायाला भिंगरी लावली आहे. गुना मतदारसंघातील गावागावांमध्ये त्या प्रचार करत आहेत.

लढत सोपी नाही

राजघराण्यांचे आणि उमेदवारांच्या श्रीमंतीचे मतदारांना पूर्वी इतके आकर्षण उरलेले नाही. त्यामुळेच ज्योतिरादित्य व नकुलनाथ यांना नियोजनबद्ध प्रचार करावा लागत आहे. ज्योतिरादित्यांचा मागील लोकसभा निवडणुकीत गुनामधून पराभव झाला होता. तर मागील निवडणुकीत भाजपला छिंदवाडा येथे यश मिळाले नसल्याने भाजपने येथे यंदा बराच जोर लावला आहे.